Deirel Committee min cazin kan irel hna. Pakhat hnu
pakhat kutdongsawh pah le mirh pah khin kan vun irel than hna. Deirel Committee
hi kan dihlakah minung pathum kan si nain a phanmi hi minung pahnih lawng kan
si. Tawk Huptiah hawikomhnak le dawtnak in kan auhmi Pa Hup a phan rih lo.
Keimah (HnephnopHmung) le Lovely Nancy lawng kan si. Nancy hi far pakhatte kan
ingeihchunhmite asi i dawt ai huah ngai. Kei nih cun a min fak hmanh in ka ko siang
lo. A um lo caanlawng ah hin mitchinh bute in Lovely tiah ka auhmi a si. Amah
nih cun ngakchiatuai khin a ka tuai i muthai hna a ka pek tawn. Tawk Hup hi LBC
ah cun minta Nay Toe tlon in a tlong vemi a si. Nancy nih hin muThai pakhat le
mawtaw citnakman 50 he a hnemh tawnmi a si. Hnoh a thawng ngaimi tlangval
pakhat a si ve.Tarzan Thawng hi Deirel ah pumpek bak in a kan bawmtu a si. Kan
herhbaumi paohpaoh amah sin kan chimh ahcun a kan tuan piak dih. Deirel caah
pumpek in atang taktakmi laikhal pakhat
a si ve.
Suimilam pakhat hrawng a rauh hnu ah Tawk Hup cu LBC
Library a rak phan ve. A vun luh bak khin “Ka dua le hna, kan inn kar le Center
kar bak mawtaw lam a pit tuk i ka tlai sual,” tiah ahohmanh hal hlan ahamah le
amah a vung i phuang. Library khaan chung i a kite ah a thumi TarzanThawng nih,
“Si maw, Hledan lamkam i nungak he supsap dawr ah a thumi kha nangmah na si lo
tih?” tiah a vun bet colh. Minung zong kan hung tling deuh ibia sawngtlorh in
kan i la hna.
Hnephnop: “Khah, nai
hrawng cu LBC mino pawl kan thazaang a der ngaimi a lo ee, zei dah a cang?”
Lovely:
“Fur a si le si, LBC mino nih fund caah zuarmi nithawng zong a cawmi hnihkhat
telawng an si, nithawng ngei lo pei kan tam tuk cu.”
Tawk
Hup:
“Kei hna nithawng ka ngei lo nain Center cu ka phan peng ko cu teh, nithawng
ngeih le ngeih lo he a sai loh.”
Tarzan Thawng:
Mirh nawn le zohhuaha lo khin, “Kei cu Tawk Hup bantukin nithawng a ngeimi
nungak pei ka va sawm hna cu.”
Lovely:
“Center ah ka nithawng a tlau pah tawnlengmang. Atu hin a pathumnak a tlau a si
cang. Kan hnu zarh hnih ah khan ka nithawng Tawk Hup zaal ah ka hmuh,” tiah a
vun zai.
Lovely:
“Hnephnop, kan hnu zarh i ka nithawng na rak ihlanmi kha na rak iput ko lo
maw?”
Hnephnop:
“Eh khah, loh bak! Ka philh sual.”
Tawk Hup:
“Nizaan nungak kan lennak ah pei na philh kha, phone chawn law thaizing
zingpumh ah rak putter, a dih ko cuh.”
Lovely:
“Tawk Hup, bia hi fawite in chim hlah, muthaikan pe ti lai lo.”
Tarzan Thawng:
“Ka duale hna, atu hi ruah a sur tuk ee, nithawng nan i ken cio hna maw, kei ka
ken lo hih.”
Kan dihlak in ar ko kan
um hna. Mino kong kan iceih lai kan ti ko nain nithawng kong ah kan rak buai
deuh ving. Nithawng kong kan buai liopi ah ruah a tuk a zual. Deirel zong kan
vun ilim pah cang. Ruah adai hlei loh. Lovely cu a mitthli a hai hnik,
“Hnephnop, nangmah ruang ah nithawng
loin ka umnak a sau tuk cang. A tharin na ka cham lai.”
Ka tangkabawm ka vun
zoh cu 500Ks ca a chia nawnte tlap khatte khi aum. Khulrang nawn in vun dawh
sual ahcun a tlek ding khin a um. Center ka rak rat pah ah khan ruah nih ceilak
rak den ruang ah a si. Tarzan Thawng nih,“Lovely, an dawtnak hi hiti hin maw na
zoh sawh ko lai,” tiah awthir nawn khin a vun nawl.
Tlawmpal a vun rauh in Deirel
cu a thar in Tarzan Thawng nih a vun rel, print zong amah nih avun tawlrel dih.
Suimilam kan vun zoh cu a tlai ngai cang. Thlalangawng in lenglei kan vun zoh
than, ruah sur a dai rih lo. Inn lawi ding tiah le nithawng ahohmanh nih kan i
ken fawn hna lo. Library khaan chung i an chiahmi nithawngnih kan mit a kan
hlang tuk—mino fund kawlnak caah tiin an chiahmi a si.Tawk Hup nih leklak tiah
nithawng pakhat a vun thiar. Cu hnu ah Tarzan Thawng nih ka sam a cin sual lai
ti phan ah hnighngap a ti i nithawng cu a vun i lakcolh ve. Kei le Lovely zong
kan i tuar ve ti lo i nithawng pakhat veve kan ilak colh. Center in lenglei kan
hun panh bak ah Mino Pastor he kan i tong sual i Tarzan Thawng cu a lau thatthat.
Zunput lei hoih in duak tiah tlik colh aa tim. Kan dihlak te khin a tlar in kan
dir i aa rual tein, “Saya, mino nithawng pali Deirel nih kan in cawk hna,” tiah
zuangzaam lo tein kan vun chimh. Kan dihlak in Lovely cu a inn tiang damte in
kan va thlah. Lawi lei cu HmawbiAirways kan i cit hna i kan inn cio ah kan lawi
hna.
July 14, 2013
Hnephnop Hmung
