April 20, Yangon
Nungak tamdeuh nih cun a ropui takmi zaan riah dum ttinak date kha a
tlangval pa sin in a ruahchan lai, cun thil man sangsang laksawng hna kha na a
tlangval pa sin in ai ruahchan ko lai nain thil biapi ah kan rak ruah lem lomi
ni fatin kan cawlcanghnak ah na dawtnak hna kha zungzal in langhter khawh izuam
law cu nih cun kaphnih nan idawtnak lam thluan ah thatnak a chuahpi khawh lai
timi ruahchannak he hi capar hi ka lenpi lainu le laipa ca'h saduhthahnak tampi
he ka van tial.
1. Nikhat ah voikhat Phone Chawnh Ding!
Nikhat ah voi tamtuk chawnh khi a tha ko lai nain rian le sianginn kai
ciomi ca'h cun hnahnok a si kho ve, caan zong a la tuk lai. Cu ca'h lam hla lam
nai nan um zong ah nikhat voikhat tel cu phone in thawnghal khawh izuam peng.
Internent, viber,fb tbk silo in phaisa dih te bak in caan sau zong silo in
thawng na hal peng lai. Na chawnh caan hi ai khat peng fawn lai. Zaan ih lai
silo ah breaktime tbk caan ah khin pel lo tein chawn peng hmanh! Na chawnh lo
caan ah an hlam lai? A dam hnga lo maw? an ti lai, a phone maw ai rawk hnga an
si lai? Ai manh lo maw? an ti lai. Mah bantuk in khua a ruah tik ah a thinlung
ah na um deuhdeuh ve tinak si. A thinlung na um deuh ah cun dawtnak a karh deuh
tinak si ko. Voikhat phoen chawnh cu thilman sungnak in a sung deuh, a aw nemte
na theih lai, “ni hin na tlamtling maw?” na ti vial ah khan, na tang ah ai bek
lai.
2. Zing le Zaan ah Message Kuat Peng Ding!
Chun nitlak zong nan um ti ko lai,sianginn zong nan kai ti ko lai, phone
zong nan ichawn ko lai nain a thawh hlan te ah "Dawt, tho tha maw? na cah
ni sunglawi si hram she" tbk in cakuat tawite kua peng, cun zaan iphone
nan ichanwh ko zong ah a ih lai tel ah cun "Dawt, nihin na tlamtling kolo
maw? Mangtha tuk mu. Kan Dawttuk" tbk in ca tawite kua thiamthiam. Cucu thil
har le caan tampi le phaisa tampi pek a hau lo mi a si nain caan hman te cun na
tuah hau ve lai. Zaan a ihkar an philh hmanh ah a thawhka na message hmuh cun a
mitthlam ah na cuang colh lai, a ih lai te ah na message a hmuh cun lunglawm
thanuam tein a it ah cun a mang zong ah an hmuh fawn lai. Zeitluk in dah na
care timi a theih tik ah cun an dawt lawng silo in an upat tuk fawn lai. Cu nih
cun dawtnak hri bantuk in an ttemtawn hna lai.
3. Inn Tiang Thlah Ding!
Leng nan chuah I, nan len caan ah hin tlaipi ah lawipi hlah. Nu pakhat a
si tik ah inn lei lungretheih kha ruah piak chih a hau. Nan lawi tik zong ah
motor ai ken ko zong ah ai ken lo zong ah Bus in lawi ding nan si zong ah inn
tiang va thlah peng. Nangmah thlah lo khan a inn lam zong a tlau fawn lai lo,
amah tein a tin kho ko nain inn tiang na thlah tik ah cun an bochannak a karh
chinchin lai. An zumh lai, an tleichan lai cu tik ah ai lawm zungzal lai. Inn
lam pial tiang tbk tiang thlah nak in, inn hmai silo in inn leng tiang tel cu
va thlah peng ko.Cun, “nihin na caan na ka pek ca’h kai lawm tuk Dawt!” na ti
lai. Na thinlung chung ah a ummi hi thup hlah, na feel ning tein na theihter
lai, na chimh lai. Na hawile sin ah na va khuan len na va fak len le na va chim
len nain na dawtmi sin ah direct bak in chim colh. Cu tik ah nangmah le leng
chuah cu a save ti a theih lai, nangmah he leng chuah ti a duh peng lai. Hmun
pakhat khat kal a duh zong ah an sawm lai.
4. Nan iZumh a Hau!
Ai duhmi nungak tlangval nan si ah maw? ai um deng ding nan si zong ah
mising pi a si veve mi le chungkhar ai dang veve mi nan si tik ah pakhat le
pakhat nan izumh bak ahau. Cuti nan izumh khawhnak ding ah cun zalong tein bia
iruah le thawh ichuah ding asi. Zeihmanh thuhmi ngei lo tein nan ichimh dih a
hau. Na thinlung a dihlak in a thei lo kho men nain na dirhmun le na sining cu
a theih hau. Mah ti silo cun thil hmete zong in ithennak a chuah kho. Minung cu
kan izumh tilo hnu cu a dih bak si ko. Cu ca'h pakhat le pakhat izumh bak nan
hau. Cucu thilman sangsangnak in a sung deuhmi a si.
5. Nithla Pawl i Cinken Ding!
Pa cheukhat cu nithla hi an icinken kho bak lo. Zeidang nai cinken khawh
lo zong ah na nungak he ai pehtlai mi ni le thla cu nai cinken bak ahau ko. Na
note book ah maw silo na phone chung ka khat khat tel ah cun itial law an hal
caan paoh ah leh khawh ding in icinken. Eg. Na Darling Birthdary date,
anniversary date tbk ni pawl hi cu nai cinken bak hau. Thil hmete ah na ruah
men ko lai nain nan karlak ah dawtnak thawn tertu le thil lianngan a chuahpi tu
an si kho. A BD ni hmanh na cinken lo ah cun a ca'h na sunglawi kho lai lo, zei
ah a ka rel lo tiah ai ruat lai. Cu ca'h na dawt tak a si ah cun amah he ai
pehtlaimi ni le thla hna kha cinken khawh izuam.
6. Hmailei Kong ah Saduhthah Ngei Uh!
Hmailei kong ah nai tinhmi le na ruahmi kong pawl kha theihter ve. Cun,
amah ca zong ruah piak chih. Cutik ah zeitluk in dah na ham le na ruahchan kha
a theih lai. Hmailei nan kar hlannak ding kong kha pakhat le pakhat khuakhan ti
ah a tha bik. Zeitluk in dah na ca'h a biapi mi le suallam ngeimi nu a si kha
ai theih lai. A ruahnak zong na hal ve lai? Nangmah he pehtlai in a saduhthah
zong na hal lai, na chimh ve lai. Ai duhmi le thit ding tiang na duhmi a si ah
cun hmailei kong nan saduhthah hi nan hmailei lam ca'h thil biapi tuk a si. Cuca’h
nan pahnih in tan nan lak ti lo cun nan lam a tluang theng lai lo. Zungzal ca
ding tiang in na thim ai theih tik ah cun na ca'h a nunnak hmanh kha a sian
lai.
Acunglei ah ka langhter mi hi Pa ca lawng ah silo in nu ca zong ai tel
chihmi a si. Nain, I duh hnu ah hin nu nak in pa hi nan daithlang deuh tawn rua
ka ti. Helh lio vial te cun caan hman tein nan cawlcang ko nain van iduh hnu ah
cun pa cheukhat hi zalong in nan ila le nan daithlang tawn. Ai duhmi nungak
tlangval hna cah bawmtu tha tel a si hmanh maw timi ruahchannak he ka van
tialmi a si. Lamnai lam hlat ummi kan si zong ah kan mah le caan he ai rem ning
in tuah khawh izuam hna sih.
