Malaysia Tlawnnak : Oct 8-12, 2016

CSO Cheras

Rian ah ka buai lawng silo in Malaysia ka kal ding zong cu tlawmpal van buai pi hau. Mitkuh cim lo, thinthi in hngilh khawh lo chinchap, thin tur chinchap, Malaysia ummi laitlai u le nau hawikom hlun he thar he van i ton ding mitthlam van suai hrim ahcun ka pum lawng hi kawlram ah a um sawh le si ka thinlung le ka zeizong vialte cu ka kal hlan thlakhat ah Malaysia a phan cangmi kai lawh ter.

“na mui hna kan in thei sual la loh, zei thil dah nai hruk lai” tiah Malaysia ummi kan khuami (KCF) nih an ka hal. Amah nih don ding ka si ruangah.

Alor Zaanriah ei lio

“angki lum vandum rong le bawngbi nakmi ka sam kir la” ka hei ti hna. Ka voikhat tlawnnak lawng siko nain thil kuat tete zong cu a thahnem ngai ve. Tlawmpal ah leng ka hung chuak “Hey! U Chan” tiah ka van auh. A ka zoh ko nain a ka thei bak rih lo. Bag ka cawinak ah ka thawsa le ka angki leng kai phawih le kan khua pawl nih an ka thei ti lo. Ka ta Kapte nih a rak ka don ve. Ka mit cu vanpang le cunglei rumro ka zoh ko, ka mitthli tlak ai tim peng. Kan ta far in kan pa le nih a luancia kum ah vawlei pumsa nunnak in a kan kal tak cang. Atu bantuk in kan ihmu than te lai tiah ka rak ruat bal lo tik ah……thinlung a tap!

Imbi CCF ah Noami te chungkhar he

Makota Cheras (Khuamin spelling ka palh khawh men) : Khampat chungkhar mi tamdeuh khuasak nak le center zong a umnak hmun ah an ka kal pi. Rian off bakin a rak ka dongtu Pastor Standly le khua upa pawl nan chungah kai lawm tuk. An umnak hmun cu tha ngai, ka thla tla dom hoi. Pakhat hnu pakhat in keimah kut tlaih ah an ra. ‘khua ah na um rua kan ti cu’ tiah pakhat ka van chawnh, a dang pakhat zong “zeitik ahhme Malaysia hna na rak phak” ka ti hoi. Zeitik hmanh ah mui hmuh ding ka rak ruahchan lomi khuami pawl he kan i tong kho hna. A thaizing cun KCF ngakchia pawl cachimh ah kai thawh. Ka khuallam ka ba ngai ko nain ngakchia he um ti cu nuam tuk in ka thei. Nikhat chung class pahnih ah ca ka chim. An mah he bia tampi kan iruah. Lente zong kan i celh ‘kawlram in kan tlawm hna’ ka ti ahhin na lau kho tuk. An khuaurahhar, Malaysia cu misual le damiah an tam tuk tikah inn leng in chuah bak cun passport kha i ken, phone zong kut in ken ngam silo. Ka phak zaan kha pumh kan ithawh lai ah ka phone cu kut in ken ka timh, ka fa pa Samuel a ra le “nini nan, damiah nih an in lak piak lai. Khoi! Keimah nih in ken piak ning” a ka ti. Amah cu ngakchia te a si rih. A bawngbi zal ahcun ka phone cu a hei sanh.

Cheras Alam Jaya: Sazawte (Pu Hoi Cung, Khuabawi a tuannak khua a si) Ka bag fate cu kai bei le cheras lei kal dingin class a dih bakin kai thawh. Thil zong tam kai ken lo. Sau zong caam manh ding ka si fawn lo caah thil thlen ding fangfang kai ken. Ka ta Kapte nih a rak ka lak, an nu farual in. ‘Tha Tha hi nan mah fa lo, lo. Mifa ai cawm mi nan lo. Ai dawh tuk” ka hei ti. ‘Tha Tha cu duh a nung, holh a thiam rih lo nain ka mitau a rel khawh. Leng ka chuah hmanhah kal zul ve lai ati (a ka uh)’ a tu tiang hi ka mitthlam ah ‘Tha Tha’ a cuang. Cheras ahcun zahnaktlang pawl an ceilak an um nak si an ka ti. Khampat pawl zong zaanlei hnuah UZing he nikhat hnu nikhat kan va leng hna. Ka lunglen he ka ngaihchiat he kai lawmh he ka pum chungah thil pathum an i pai. Azaan ah Saikah lei ka chungkhat pawl nih an ka leng. Bia nuam kan iruah hna. Malayisa ahcun ni kai tha bak lo. Ih nih a tlai, thawh nih a tlai, nikhat a liam manh theih a si lo. Ka mitkuh cim kho lo.

Bus Stop: U Zing te nu fa he bus stop ti lengmang mi ahcun breakfast kan ei. Noodle soup hi ka uar ngai le cupeng cu kai cah ko. Kan ei dihin Cheras CSO khuabawi ‘Sazawte’ he kan itong. Lam hla nawn khin ka hmuh, ka zoh ko nain a mit a thial. Ka vai i fuh le ‘Hoi Cung na si maw’ ka ti. ‘siko’ ti vial lawng a ka leh. Mit thial loin a ka zoh ko, Stephen cu ka kut khat talei in kai cawi pah. Nutung cu ka lo pah, thawhka si pah le a rak ka palh diam ko khah! Tlawmpal inn cung kan kai ah a van ka phone le CSO ah ra seh tiah order a van chuah.

Cheras CSO: Class pakhat hnu pakhat ah ka lut. KG pawl kha game ka celhpi ta manh hna. Adang pawl upa deuh kha cu bia tlawmpal te ka ruah hna. An khuabawipa zong cu a zungkaan kherkher ah ka va ton. Ka cauk chuahmi kong hna kan iruah. A mui le a sam hi a sawt pahmi zong a lo. *Sawt ticu Malaysia holh si. Cun, akar lakah a dang pakhat a laar ngai rihmi cu “ahman la loh” tisi le Tlangpi holh in chim dingJ. Mekazin tbk ah ca ka rak tial tawnmi a reltu ka mui a ka hmu bal lomi he hna zong kan itong kho. ‘nangmah maw? Lovely Nancy cu na si’a ka timi an tlawm lo.

Pudu Zaan: Ka U Ngun ;Josep , Pudu State Counsellor umnak khua a si. U Ngun cu, atulawng mui kan ihmuhnak a si ko nain maivan in caan saupi kan ikom cang. Mitha a si, upa lungfim a si tikah keimah zong nih ka U bantuk in ka ruah ve. Mi raltha zong a si, feminist pah ve J Malayisa cu ramdawh, ramtha, ram nuam a si ko caah cun hmundang kal kai timhnak ah caan ka pek khawh lo caah a khuaram kong ka tial ti lai lo. Laimi sinah ka thutdirnak le ka tlonlennak pawl lawng ka tialnak a si. UZing he UNgun he laksawng ceilak an ka cawk piak. Laksawng cawk piak cu ka duh ko nain phaisa thenh cu ka duh lo. A cheukhat cu kut tlaihnak ah tbk khin phaisa thenh an hmang le ka khingrit tuk. Ka pe hlah uh ti zong ah an duh lo. Kai lak lo ah le an lung nuam ve fawn lo cucu Malaysia ah har a ti cemmi si. Zeidang vialte ahcun kai nuam. Kai lawm tuk ko. Capo in ka ti tawnmi hna cu “Pastor zong ka silo, fund kawl ah a rami zong ka silo tlawn sawh bak ah ka ra le phaisa thenh cu ka duh bak lo” ka ti ko hna. KLCC hrawng kan lennak cun lawipah ah Hakha Sabuti dawr pawngah zaan riah an ka ei pi. Annie zong rian in an lawi sile a van ra colh ve. Zaan riah thaw taktak zong hi U Ngun te nih an ka danghmi si thiam rih. UNgun, nangmah le na chungkhar cungah kai lawm tuk. Zophei tlangval anih a nih timi lawngte inn khat in an rak chuak. Ramkhel kong US thimnak ding caah Pu Trump le Pi Cliton kong tulio CNF/A dirhmun le Malaysia an thutdir nak kong tbk kan iceih hna. Kan inuam ngai hna. Keimah zong mi holh tam ka si ve. An nih zong an huam ve. Pu Trump le Pi Cliton kong le bang ahcun kan i vua dih deng rua ka tiJ. Saya Toe Toe Lian kha Trump si U Ngun le an pa kha Pi Cliton an si. Ka hawithar, le ka nau Annnie nih a ka riak. Kan ih tlai pah tikah zing a thawh ka thei lo. Ka thawh hlanin rian ah a rak kal diam. Ka lungtha lo tuk, ‘kan hlau siang lo le si ka U’ a ka ti. Annie ka thinlung ah na um peng.

A sen pahnih Vs Anak pahnih

Siamping: Athaizing cu CNF lei RC upa pawl he meeting tuah dingah Siamping leiah an ka lak he ka bag te he cun kai thawh hoi.  Meeting kan van tuah. An biahalnak cu a tam ngaingai. Kawlram in ka van ithawh hnu ah biatak tein Shane ram le Kachin ram lei ah kahnak a um tikah cu kong cu an ka hal. “Malaysia ka phak hnu a sile ka thei ve bak lo” ka ti hna. Miding le mifel zong kan silo, hawinak in a tuah kho deuh le thazang a chuah kho deuh zong kan silo nain miphun rian kan i awt tik ahcun mipi hmai zongah raltha tein bia chim a hau. A kut a thlir caan le ka chungleiin ka tha thlir caan a tampi ko. Chuncaw zong sunglawi emem in dawr ah an ka ei pi. Bia tampi kan iruah, alanghlat in riantuan tti kan si tik ah mui taktak kan i ton hi a sunglawi kho tuk. Meeting kan dih hnuah Faiceu Media U Robert he tonnak kan ngei. Ka lung zong leng vir. Faiceu ka ta le pawl ka mitthlam ah nan cuang, ka U Van, Ka U Daidin nan um tilo hnu ah malay ka phak hi cu a poi tuk eh! Chuncaw kan ei dihin Imbi lei ah ka hnifenh bu he cun Taxi cungah ka kai le an ka thlah than.

Imbi le Alor : Imbi ( Lot 10, president umnak khua) hi atu ka umnak Hlaing thiri a lo tuk ka ti. U Sui (Pastor KB a nupi) te inn ah kai thum. An fale hi duh an nun lawng silo in an thekvak zong tha, an cawlcang peng le nuam ngai. Tlawmpal ah ka hawile he timesquars leiah kan kan ithawh U Manu phone ka hei chawnh cia. Kapte he a hawipa he kan kal. Tlawmpal ah Moses Cung le Cheras khuabawi zong an rak phan la le Alor ah kan choi hna la ti si ko cang. Kai nuam tuk. Ei le din hi sport ah ka thiam cemmi sile mu. USui nih kedan a ka hruk termi kha kai ziak rua lo ka ke a khawh dih le Kapte le U Ngen cu ka kedan cawk ah kan kal. Coffee tuah hi ka intrest tukmi sile UManu dawr chung bak ah ka lut le ka zoh. ‘hi hi zei si? Hi hi zeitin nan tuah’ tbk pawl ka hal. Kan kup, ai ton cia le ai hmu cia bang. A nau taktak bantuk in a ka zohtu U Manu he kan i ton hi cu nuam kho tuk. Ka uar tukmi laksawng zong a ka cawk piak rih. Dawr an khar hngap le Alor leiah kan choi hna kan izul duahmah hna. Alor khi Yangon 51^st le Thailand he ai lo tuk ka tile ka thla tla colh hoi. Bia kan iruah, Cheras khuabawi nih bia ceilak a ka hal. Hawikom thar pa 7 kai chap. Stallin sam kha ka mitthlam ah cuang peng. An ei khawh tilo mi zong khi tuanvo ka lak vir le Cheras khuabawi nih ‘hi tluk in na ei khawh ding kan ruat bak lo’ a ka ti ve bak. Mah zaan kha cu kai nuam bak lo. Lam ka kal pah hin tha te zongin ka kal kho lo ‘kai hlok, kai thui, ka lam pah’ cutin cun ka kal. Lawmhnak in ka rak khat.

Mi khual khua koah ka lawi tlai ngai, inn ka phak hnu zongah cun Pastor KB he bia ruah kan thok hoi. Kawlram ramkhel zong cu theih a rak nuam ngai ve le deilei tiang bia kan iruah. Athaizing cu ‘zarhpi ni’ a si. Imbi CCF ah kai pum. Chawnghlang rel ding caan tha zong an ka pek. An cungah kai lawm tuk. Ka mitkuh cim pah lo tikah ka ngu deng lengmang. Nau chuakthar thlacam ah Bawipa sinin an hmuhmi fanu fapa rosung (13) bak an si. Amen! Biatawi na chim lai an ka ti ko nain ka el hna. Mino pawl kha church choir an thiam tuk solo sami zong kha a thiam tuk. Pumh kan dihin hmanthlak nak in caan kan la. Ka takcung in Noami a ttum duh tilo Noami cawi bu in tlangval pawl he hman kai thla.

Trump le Cliton kong kan iceih lio

Kawlram ka kirnak ding ni thla a nai chin thluahmah. Malaysia ah ka thla tla chin thluahmah ve. Kai nuam deuhdeuh ve. Then lai darkhing an tum deng cang timi lungthli nih a theih tikah mit chin ngam loin ka um ee. Cheras leiah zarhpi ni zaanlei in ka kir. Zaan riah ei kan in hngak hih an ka tile Thar Gyi nih a ka thlah. Taxi cung ahcun Thar Gyi he bia tam ngai kan iruah. “tlangval pi nih nupi kawl pah cang” ka hei. Cikhat te ah Cheras kan phan. Kan chungkhar le ka unau pawl nih ‘phaisa thenh le na duh tung lo le zaan riah ei tti nak kan tuah ko hih” an ka ti. ‘tha tuk. Hi ti ding hi si’ ka ti hna. Voikhat hmanh ka hmuh rih lomi hna ka chungkhat pawl he zong kan itong than. I hmu ti lo ding ka ruahmi he hna zong kan itong than. Bawipa na tha! Kan unau rual cun bia nuam kan chim hna. Tlawmpal ah U Zing te inn ah kan kal. A Rem, U Zing tiin zaanlai ah kan i hngilh kho lo le ei awk kan kawl. Thaizing arikhuan in A Rem hi rian ah a kal ding si. ‘tluang te in va kal awh! An in tlaih sual la UN Card zong na nei fawn lo le” tiah ka ih bu cun ka hei ti le Pathian arkhuan hlanin Kalong tisi rua mah ka leiah cun a kal. Kan unau rual in kan iton caan a tawi tuk ko nain a tawi tukmi caan kha a rak sunglawi tuk, zungzal caah.

KCF Center: Tuhi a donghnak zaan cu a si ko cang. Dawtmi hna le lawm le nuam in len tti cu ni a liam manh hmanh kan thei manh tawn lo. Rawl ei sawmtu, laksawng petu keimah leiin zeizong vialte retheih ka pekmi hna Khampat chungkhar nan dihlak cungah kai lawm tuk. U Chan te nih zaan riah ei an ka sawm. Ka khim tuk nak ahhin thut zong ka thu kho lo, dir zong kai harh. An ka dawtnak hrai cu a liam in a liam. Rian tuannak ram le tlaihkhih tamnak hmunhma ah khua an sa ko nain Pathian an dawt, keimah an ka dawt caah retheih an i pekmi vialte cu re a theitu ka hawikom, ka unau nan dihlak cungah thluachuah inn khar s ihram ko seh!

Airport kal dingin motor cung ka kai hlan KCF ngakchia pawl he kut van I tlaih hna dah ngai, a har ko ee. Zaphei a van i tong i, ‘dam tein sayama’ an van ti ahkhan mitthli cu amah tein ai sem ko. Thongtla bantuk in, inn chungah an khumh hna ca an cawn. Malaysia rammi ngakchia he zong ca an cawng tti kho lo, lente an icelh tti kho lo. ‘leng chuak hlah! Damiah nih an in tlaih lai” ti cang ahcun zeitin ngakchia hna thinlung cu tihphannak in a khat ko lai ee. Ka nunnak catlang cungah nan min kan tial dih cang hna, zeihmanh nih a hrawk kho ti lai lo. Malaysia cu ee, ka ngai ko ee na ti hi nan mawh lo cu the! Ka bag pakhat te he ka phaknak ah kai thum, ka ithumhnak ah ka ei, ka einak ah ka it, ka ihnak in ka tho. Keimah zong nih Malaysia cu ka philh ti lai lo. Ka thinlung ah na caam zungzal ee.

Related Posts