 |
| Photo Credit : Khin Zar |
Ka nu nih a ka ti tawnmi cu, “nangmah nih na dawtmi
nak in nangmah an dawtu” nai thim deuh lai a rak ka ti peng, mah bia cu kum le
caan sinah kai tthanpi. Nain, college kum khatnak ka kai lio ah hin darling
pakhat ka rak nei. Kan rak i duh ning le hmuh ning zong hi simple te khi si ko.
Siangngakchia a thar cu kan hei sile zakzum nawn te khin campus chungah kan
hong lut. Kan mit khi cho lei hmanh kan zoh ngam set lo. Ka hnulei in ke kar
hlan thawng thang deuh ka theih hmanh ah ka tlu deng. Ka ningzah pan le ka
ralchiat ai cawh ciamman le thlakhat chung sianginn ka kaimi cu hell tlak he ai
lo ko.
Cu lio ahcun hawikom pakhat te ka ngei. Ka hawi thar
si. Pa a si fawn. Sianginn ka rak kai lio ah hin mit hmai panh te in a ka chawn
hmasa tu a si pin ah ka komh hmasa cemmi zong a si fawn. A caan sau deuh kan
van ikom, kan itlaihchan, kan sianginn kai zong nikhat hnu nikhat a van ithawn
thluahmah. Kumkhatnak kan van dih. Hi tiang ahhin hawikom kan si rih. Ka
ngakchiat tein ka rak komhmi hawikom bantuk khin ka komh khawh. Kan ngakchiat
lio thingkung kai ttimi le inn-te ai tiam ttimi komh tluk khin ka komh khawh.
Cutin, sianginn ah hawikom ka van ngei. Kai nuam, sianginn kai ka lungtho chin
thluahmah ve. Nikhat ah class tlawm tuk lawng hna kan ngeih khin ka thin hung,
lawi ka huam lo. Mah ka hawipa te he kan um ahcun ka pawngkam a ummi hi a philh
manh kai thei tawn lo.
Caan a hong liam, a bia el ka duh lo, a lungfah ter ka
duh lo, a duh lomi tuah ka hrial. Mah ti khin ka hung um. Fekthup in a ka zoh
lio hna ah tluk kai tim, feeling phundang te a ngeimi kai lawhter. Kan van upat
ve ruang zongah a si lai cu, a hlan bantuk in a ban kai tlaih caan maw? silo ah
ka liang a ka kuh caan tbk hna ah khin phundang pin in hung um.
Hawikom dawtnak in hmai kan fong chin i, nikhat cu “propose
a ka tuah”dawr pakhat ah hmaitonh bak in kan thu, mah bantuk hin a ho hmanh nih
propose a ka tuahmi an um rih lo i thutzia le din ei zia zong ka thiam lo. Kum
saupi ka komh komi ka hawipa hmai hmanh ah mithi bantuk in ka um. Keivial
hitluk in ka kut le ka ke zong kik vir in ka um, ka holh hmanh ah ka hmur a ka
thlirh va si kaw, ‘zeitin a nih vial normal tein a um khawh hnga? a pasal tuk’tiah
ka lungthli in ka hei i ceih pah. Aruang cu, pa pakhat nih nu pakhat sin ah kan
duh timi bia chim hi an i hark bikmi thil pakhat ah ai tel tiah ka rak theih
bal. Nain, khua ka ruat! keimah nih ka dawtnak cung le keimah lei in zeitluk in
dah ka rak pek chanh timi cung ah cuai chunh in “kan duh” a rak ka timi si.
Amah a ruah ning ah cun “Nancy nih hin a zungzal in a ka theihthiam lai, ka
duhmi a ka tuah piak lai, ka tang ah aidor lai, zei ca’h ti cun a ka duh tukmi
pa pei ka si cu” tiah a rak i ruah. Zumh ning, ruahchan ning in thil a cang ti
lo, ai duhmi kan si hnu ah thil tampi ai thleng, a tu le tu thil fate zong ah
ka nuar hnawh, ka ung, ka hmur kabo hnawh, nu ka si tik ah kai hnoh ka ti lai
cu? Mah pawl kha a ka tuar piak kho lo.
Keimah lei in pek chanh lawng a duh, a mah lei in pek chanh a ka tim ve lo tik
ah thla khat kan i duh hnuah kan i then. A tha ko, nang he cun zeitin hmanh kan
si kho lo a rak ka ti. Mah bia ka theih zaan cu it lo in khua ka ruat. Kan duh
a ka timi hi ka zei zawn dah a si. Nancy timi ka sining hi a si lo maw? ka
hmurka a thlum ruang ah maw? mi cung ah dawtnak ka ngeih ruang ah maw? ka holh
a tlawm ruang ah maw? a phun phun ka ruat.
Ka first love he kan i then ko nain “tlangval ka ngei
ti lai lo” tiah bia kam nak ka tuah lo. Ka chimmi pakhat cu tlangval tampi komh
ka herh rih, tlangval pawl zia hi ai dang lengluang timi pawl ka theih chin
lengmang a herh rih. Hi nak thuk in kai
ralrin a hau i a ka dawtu tak i a thinlung hi ka theih a hau timi ka ruat. Caan
a hung liam, ka first love ka ngai, hmuh ka duh, bia ruah ka duh, phone chawnh
ka duh, zeidah a tuah hnga, a tu hi nungak ai hmuh cang hnga maw? timi a mah
cah ka lungre theih a zual, kan rak i duh lio hmanh ah mah tluk in ka ruat lo. Voitam
pi cu a mah kuat dingin message ka tial cuahmah, send ka hmeh lai ah delete
than lengmang. A phone zong call ka timh hi a tlawm ti lo nain cancel ka tuah
lengmang. Keimah le keimah tei kai tim ko nainblungsak a har tuk. Kan sining hi
zeitlukin fonh tonh awk a har ti zong ka theih, zei ruang ah kan i then ti zong
ka theih ko bu ah a cah ah khua ruah caan ka ngei kho rih.
Kum khat a ruah ah short trip pakhat kan kal. Kan zate
minung (12) kan si. Pa 6, le nu 6 kan si. Mino tleirawl lawngte cu si hna kaw,
kan i nuam kho zai tuk. Kan khual tlawnnak hi kawl khuate pakhat ah asi i
yangon highway bus in nazi (9) kan i cit
hnu aa lampi ah zaan khat kan riak a thai zing ah motor fate in kan i thawh
than i nazi ( 5) chung kan i cit hnu ah a hmun kan phan. Khual tlawn tti hnu
cun van i komh deuh zong si, van i ngamh deuh, capo hna van i seih pah si tik
ah pakhat le pakhat kar ah pehtleih nak thukpi kan ngei kho. Mah ah cun keimah
he group ai khatmi Karen pa nih kan tlun hnu thla khat ah propose a ka tuah
than. Mah ah cun hi tin ka rak leh “ hawikom kan si nak in cun tampi kan i
theih kholo dahkaw, caan sau deuh la rih ca, miphun zong kan i khat fawn lo, mi
thintawi ka si mi zong hi na thei lo kho men awh” ka rak ti. A ka nih “na sin
in Yes or No lawng theih ka duh” a ka ti. Mah cabuai cung ah cun catlap ka lak
i queation pa (6) ka tial. Mah hi na phi i na hman ah cun na duhmi a phi kan
pek lai ka rak ti.
Q1. Ka nu le ka pa min na
thei maw?
2. Unau pa zeizat kan si?
3. Tlangval ka rak ngei bal
maw? na theih cun a min zong chim chih?
4. Zei bantuk rawl dah ka
duh cemmi a si?
5. ka NRC no na thei maw?
6. Zei sa dah ka ei lo mi si?
Pa hnih lawng a phit khawh cah mah ka hmun cun kan rak
i then. Ziah! mah bia cu a hngal hnga tiah nan khua ruah a har men lai. Nan
mawh lo, miphun dang kan si fawn, kan i komhnak a sau rih fawn lo, mi zeidah ka
si timi hi a thei tak maw? timi theih ka duh ruang ah si. Mah tel a theih lo cun
ka first love bantuk in kan i then thiam lai timi ka zumh.
Sicun, zeitin dah a ka duhdawtu tak hi ka theih khawh
hnga? A ka theithiam pengmi, ka herhnak paoh ah ka thui pengmi “U Ceupi” maw?
tiah le nungak a nei cang fawn. Sile, a ka mawhchiat pengmi, cu ee kha ee a ka
ti pengmi ka palhnak lawng a hmu khomi “U Bik” maw? si hnga. Ka pawng ah dai
tein a thu pengmi, ka chimmi pakhat hmanh el lo in a ka tuahmi tu, ka kalnak
paoh ah a ka zulmi “U Thawngpi” maw si hnga?
Na ka dawt ka theih
Khoi ka dah na um?
Kan hmuh khawh lo hi
Mimthla maw na si?
Na ka daw tak lo maw?
Sicun, hodah a ka duhdawtu tak hi a si?