Nihin hi rian a off ni a si. Nain, kei cu ka off lo.
Zing dang bantuk te cun Coffee dawr lei ahcun lunch box (chuncaw bawm) te he
cun “I may hate myself in the Morning ” timi hla ka ngai pah cun lungtho
thanuam tein rian leiah kai thawh. Ka rian tuannak coffee dawr le ka inn hi
minute 10 hrawng ke in kal a si tawn komi, tuzing cu ka coffee dawr hi ka inn
he ai neihnak ah ai thial rua ti awk tlun in a nai.
Nizaan i ca kan i kuat ning ahcun, chun 12:00 noon
hrawng ah kan dawr a rak phan ding si. Nihin celngel cu laimi ka tuan tti hawi
an off ni he ai tong thiam ngai. Ka thawchuah a hung tha deuh. Kum 6 chung ka
pawcawmnak i ka tuanmi cu coffee tuah hi siko. Mah coffee tuah vialte ahcun ka
thiam cemmi hi Espresso a si fawn. Ni fatin te zingka in ka van ithawh le dawr
ah chun nitlak te coffee ka tuah le nikhat ah coffee hi hrai 20 hrawng hi ka
tuah tawn cucu a tlawmlei ka tinak mu. Sunday hi ka off day he ai ton cun, CBC
(Chin Baptish Church) ah cikhat ka hei i pum. Peng le tlang pumhnak le
Christmas an tuah hmanh ah ka kal khawh lo caan a tam tuk.
Yangon linh hi dahngai, hoi linh he ai khah ve hnga
lo. A linh tuknak ahhin dawh ai a puan khawh cuh. Rian he peng ka si fawn tikah
zeidang ah caan van pek khawh timi hi a harsa tuk. Atu bantuk kan off day caan
te hi thil isuk caan le dawr i len caan siko. Zeitin kum pi kum 6 hmanh va um
cang ko hmanh ninglaw, thilsuk caan hmanh ai neih lomi nihcun khoika tlangval
dah ka chuahpi hnga? Ka hawile an khuaruah a harmi zong hi an mawh lo. Hi ka
rian pin ahhin leng chuah le vah caan ka ngei lo. Cun, cathiam lo le sianginn
kai lomi kan si tik ah mino sin zongah ka chuaklang tuk ngam fawn lo. Laimi
cheukhat he kan iton ding hmanh khi ka zenh tuk. Nain, a caan caan ahcun kan
dawr ahhin lai nungak dawh tete an rak ra tawn, ko nain lai ka si ve an ka thei
lo. Zeitin an ka theih hnga? Chim duhmi cu tlangval pakhat nei ding ah khin
caan a um lo. Leng zong ka chuak lo tuk tikah, hawikom zong ka neih lo tikah
atu bantuk in tlangval nih a off day te ah rian ka tuannak dawr te ah chun
nitlak a rak ka len ko cu, an zumh lo cu an mawh lo.
Costumer kan neih lio pi ahkhin message a rak lut.
“ka ra lio, ka phan colh lai” ka U sin in si. Chun
lingcing ko ah mileng kan nei ngai. Ka hawile pahnih he lawng cun caan sau duh
breaktime van lak zong an hmai khah silo. Bawngbi tawi khup tiang, T-shirt a
rangmi a bawngbi zaal ah phaisa bawm ai sanh timi khi a fiang tuk. Cun a orhlei
kut in phone le cauk pakhat a van i put. A zulhmi lam te cun a rak lut le counter
ka dirnak hmai tiang.
“long black hraikhat” a van ti. Ai thei bal lo chawnh
khin a van ka chawn (a ka tihram bia). Nihin cu chun nitlak na dawr ah ka thu
la, na Boss te an thinhang la maw? ti hrawnghrang khin a van ka capo cang.
“na huam can paoh” ka hei ti.
“tuzing cu keimah na lengmi sile kan dangh la”
“ziah na ka dangh la le aman kai pek khawh ve ko.
Staff nan si hih”
“um ko. Tuzing te lawng indang ko ning”
“hau loh ka ti cu”
“hau ko seh”
Phaisa cu kan i pe, kan ichut sau lak te counter
hmaiah kan dir. Ka ningzak pah, ka hawile nih an ka zoh pah.
Kei ka busy a nih ca a rel pah. Umhar lo ngai in kan
dawr a kiken te ah a thu le ca a rel. “Hna kan hnawh sual lai, alang in kan
hmuh khawh hi za ko. Nain, zaanlei rian na lawi tiang kan leng kho la maw?” a
ti pah. Ai phuhrungmi a lo pah, a ka zoh pah, cauk a zoh pah. Breaktim minute
15 chung te bia kan iruah. Zaanlei rian lawi in cinema zoh ding bia kan tiam.
Atu bantuk caan hi a sunglawi tuk. Kan tuan caan le kan idinh caan ai khat lo
tikah kan riannak in kan I ngaihmi ahhin kan ba deuhmi a lo.
Ka dirnak cun ka mit sir in ka hei zoh pah lengmang,
amah kel tein a thu, catlap pakhat hnu pakhat in a hei lanh tak. Hi tluk in
caan ka pek khawh lo bu le a rian off caan te hmanh ah i din loin a ka umpi tu
le a ka theithiam tu. Hi ka rian le ka sining vialte a ka cohlangtu le ka
chanbaunak vial a ka phihkhar piaktu a kan ton tertu hi Pathian a si ko. Zaan
mang zongah voikhat hmanh ka rak hmuh bal lomi le chunmang zong ah ka rak hmuh
bal lo in falling in love kan si khawhmi hi a mak tuk.
Rian lawng a ruatmi, inn lei ka nu le ka pa lawng a
ruatmi ka hei si. Tlangval neih ding timi hi ka rak ttih tuk. Ka neih khawh
ding zong kai zum bak fawn lo. Hiti ka si ko cu, ka hawile chim lo keimah hmanh
ka khuaruah har si.
“U Nancy, na hawipa cu khoika rian tuanmi dah si?”
tiah keimah he tuan tti mi ka nau nih a ka hal.
“khi, kan dawr pawngte Myanmar Engineering Alliance ah
a tuanmi si”
“wow….. an uar bak la. A um dan khi an uarmi lo”
“kan nih te hna zeitin hme a kan uar khawh lai”
“na hawipa cu ai za bak si. Zeitin nan itheih”
“an zung ahpei coffee parcel ka va pek hna cu, bia ka hal ti hlah” ka hei.
Ka ningzah tuk bia deuh khi a si cu mu. Kan iton ka ahcun ka mit cho hmanhin ka
zoh ngam lo. Ka tih! A fawinak cun ka tih. A rian he pehtlai zongin ka tih, a
mui le sam zong hi upa um tuk in um le ka tih fawn. Nain, tihnak phen ah duhnak
ai thup diam.
January 19, 2017