 |
| Maijayang Meeting-2016 |
Ka liangcung
tawnlo zaal te he thazaang ngei lo bantuk te khin inn cung ah ka hung kai. Note
book ukthum te hmanh cu ka liang in ka bei kho set lo, zuri bang ka hun sawn
thluahmah. Din nawnte khin inn khar cu ka vun on. Inn pi tuanglai ah ka van i
hlonh top! Ka mit cu zialmal tein kai chinh, ka kut dong pakhat hnu pakhat ka
hun tun hna. U Sui ihnak khan lei in thawngpang pakhat ka theih, ka hna ka hun
tun colh. An tlo dom, an bia ruah thawngcang cu minung min ai telnak paoh ah din
nawn tein an aw an thluk. Adang an chim caan paoh ah sang nawn in key an hun
lak thulh. Ka lung an hrin caah ka hna ka hei tun colh hngap! Ka mit zong bi
nawnte in ka hun au ve, awngkua in bih lang ka ti le ka hung dir colh.
USui vorhleikam
thumi, a mui le a pumrua cangcu chap awk le zuh awk um lo bak khi si. Ih phah
tom hngaoh pah khin “Vei, keicu, Pastor cu a si kho bak lo, cun keimahnak in a
ngakchiami cu ka duh fawn lo, a hleiin mizoh khenh le mithlop bul a thiammi,
Pathian ai bochan i a zummi a si fawn lai” tiah a pasal ca saduhthah cu hawile
hmai ah a hun caw-ngia huar ko. Amui zoh ah pasal le mahnak ngakchiat ding cu
ruah khawh dawh in ka hmu lo.
A sam cangcu
hrem hrulhmi ko a lo ka ti, silo le aihre phulhmi maw? a lawh deuh hnga a bia
chim le a umtu khi korea style kai cawn ti phun in “ai ku ai ku, a bia chim
cang cu fa ci erhmi bak a si ko, a can khawh ning “keicu, nifar tamtuk ngeimi
cu si kho bak hlah, a bik in zu din hman zir tung i din lo phunphai in ai
umtermi pawl ka huatci bak si” a chim thlu hlan deuh ah a pawng thumi ai tuar
ti rua lo. A sam ve zong cu sapherh phomh bang, phaiper ngaw in ai kir ter rua
ka ti, a bia a van tan colh a mithmai cu thinhungmi ko a lo “cuee, kha ee, nan
hei ti, mui nih cun aw…nan theih awk ah zaan riah voikhat chumh zong chuahpi
hlah! nifar nan van ti cu teh! Nifar kan va hna lo hme cu, a zungzal in inn
khat um tti ding zong va si hlah! keicu, fimthiamnak hi a biapi cem ah ka chiah
ko, fimnak nih cun nifar he zong remnak a ser khawh, kan tappi le kan lungthu
zong ah fimthiamnak a um lo cun a tlamtling kho lai lo, fimnak in a paw ai cawm
khomi a mah le a sining te ah fek tein a dir khomi, keicu ka ti bak! Tha le
zaang hna hi cu an dih in an dongte lai cuh! Fimnak cu kan nunchung in kan
tuanbia tiang dahkaw a hmun lai” a chim dih cu ritte thi bang an dai tuk
laklawh.
Holh lo ringlo
in “Ram King” cauk ai tleihmi “keimah caan” ti phun in U Sui te bia ruahnak lei
ah cun a hun i mer le “keizong, mui kha cu aw, a biapi tuk ah ka ruat ve lemlo,
a paw puar in a calngau zong ah minung kan nunnak ah cun phaisa a biapi cem ko
teh! Chanchungza a ngeimi a si ah cun miphun dang pa zong ka vat ko lai” tiah
rumnak lei panh in a van thuat ve. Phaisa nih cun zeipaoh a cawk khawh khe ko
hme cu ti si dawh in a mui kha ka hmuh, phaisa in van cung ticket cawk ai tim
phun si men lai.
Kai hrawm dingmi
cabuai a um lo, ka dirnak caan zong cu a sau cang. Mi biathli vialte theih ding
cu ka luan tuk sual lai ti ah khin thut kai tim, mah lio ah cun “ Ehem…, ti in
minung pakhat bia domh thawng ka theih i ka ngiat colh, home work tuah pah
sehlaw ka lawhter, cauk le ballpen tleih pah bu in “nan hei chim cu teh, chim
ve lo cu tiah nan chimmi chung ah khan ‘laipa’ vat ai tim mi nan um bak lo kha
mu.., zingku le bang rum tham ah cun miphun dang pa vat zong a poi ah a ruat
tung lo, a zungzal um tti ding ah miphun dang pa hna nan hei thim huar hna, ka
lung nan rawk! Laipa mitthli he um ding cu nan ruah khawh ko dah mu, lai hrin a
simi laimi phun, lai ca le lai holh a dir pimi, lai laam tiang a tleihchan mi,
lai nunphung a kilvengmi, lai thuam a upatmi, lairam a dawmi laipa bak kei cu
ka vat lai” a ti ko ee. Ahmai cang cu Apple sen bantuk in a sen.
Lai mi phun kan
vat hna lo ah cun phun tlau kan si lai, lai ca le lai holh kan dirpi lo ah cun
miphun tlau cikcek kan si hnga, kan lai laam dawhdawh phunglting hna hi kan
tleihchan lo ah cun miphun dang laam kan i hrawm a hau hnga, duhnung tukmi kan
lai thilthuam hna hi aw…. Kan upat le kan cawisan lo ah a ho rian kan ti kun
lai, lai nunphung kan kil ven lo ah mi nunphung i hrawm ding cu nan ruat kho
cio maw? lai ram kan dawt lo ah miphun dang nih a kan pen lai si. A lenglei ka
dir bu in ka lu ka suk len ve. An zapi tein a keem dih hna. U Sui nih chantlung
tiang leng tti ding in vat ai timhmi Laipa cu ka uar tuk ve.
March 2012, Senri
mekazin