Ka nun le
vawlei aa sengh chung
Nangmah cu
kan dawt zungzal lai.
2015 a voikhatnak lenhloi khawmhsuat |
Ruahpi siamsiam
in a tlami nih ka thlalawngawng cu dorkhat hnu dorkhat in a hun den. Puanzar ka
hei thawn i lenglei cu ka cuan. Ruahhlan ai tim dengmi pawngkam sining nih a
hngilhmi ka thinlung a hun hlauh. A kut pahnih cu a bawngbi zal chungah a khumh
i a pawngkam zong zoh huaha lo khin a kal thluamah ko. Culawng hlah e, a kehlei
kam ah a kal ve komi keimah hmanh kha a ka philh caan a um. Cucu, a zia a si.
Nain,a kalnak hmun paoh ah ka rak zulh peng.
Nikhat cu lung
kai chuih le ka tlu mah hmanh a thei lo, van thawh cu chim lo a ka hmu lo i a
ka lanhtak huar ko. Khua pakhat a ruah caan, lam a kal caan, bia pakhat a chim
caan, ca a rel caan, ca a tial caan pawl ahkhin keicu serchommi tunute bantukin
a pawngah ka um tawn. Mah a zia pawl hi ka rak huat tuk nain tu ah cun ka ngaih
cemmi ah a cang. Ka umhar celh lo ah ruahhan cangka in leng chuah kai tim.
Coffee shop lei ah kal ding in ka thil kai tim zau le ka choi colh. Leng ka
chuah fatin phaisabawm sente, phone le nithawng nakpi cu rianrang in ka van lak
le ka chuak. A dai tukmi hmunrawn ah ka thlapahle he kan kal ti. Khulrang in “3
in 1” hraikhat kai hei cah. Ka din tawnnak dawr a si i an ka theih ngai cang.
Coffee kan
dintti lonak zong kum le khua in an liam cang. “ka ai puan tuk lio caan, ka lungdongh
lio caan khua ka ruah i ka pemh khawhlo caan hmanh ah a ka nihter khotu. Nikum
siizung ah damlo in ka rak um lio, ka kut kha a hum i hitin thazaang a rak ka
pek “Dawt, na zeidah a fak? Ei duhmi hna na ngei maw? zeidah kan tuahpiak lai?
Na pawngte ah nizaan in tuzing tiang kan thutpi. Ka theihlo kar in pakhat khat
a cang sual lai ti ka phang tuk ca’h si. Siibawi pa nih thaizing cun nan chuak
kho cang a ti. Inn ah daidam tein nai din cang lai mu. Na pawngte ah kan umpi
peng timi hi philh hlah.” na rak ti. Khuazing lairelnak in ka tincomi van
thluachuah le lei thluachuah cu nangmah na si. Nain, na kir thiam ti lo.
Thawchuah har in
ka um caan a tlawm ti lo. Ka innkhaan le coffee shop hi a kal kai chawng.
Minung hmuh ka huam lo caan ah Album ka zoh le ka tap tawn. Nunnak cu hihi a
rak si ko rua. Vawlei cu pei a si cu, an tian cio, kan tian cio si lo maw? tiin
van i hnemh len zong ah i lungsak khawh a har.
Nangcu kan thimmi
Ka duhmi,
Ka hawi bantuk, ka ta bantuk
Ka pa bantuk na si.
Inntang ah hmaiphiah
ding in ka tum lio “Dawt, kan hngah ko hih” timi aw dah ngai ka thei balmi aw
ko a lo. Ka vun zoh cu…U Van a rak si, ”Aaa, mah tluk tuan cun na rak ka sawm
hoi" tiin ka hmur ka bohnawh colh. Nizaan in kal kan leng kan i timhnak
kong kan ceih lio te khan kal kai ngaih tuk ko nain a ka dawt tuk khi ka theih
caah lung nuam lo tiang in ka ti hram tawn.
Tihram hna kan
huam hi kan i dawttuk ruang a si kho ko.Kan i unh lengmangmi zong hi dawtnak
karh tertu dah ngai an rak si. Caan sau cu kan i unh kho in kan i hlat kho
taktak fawn lo ruangah dawtnak a thawnter chin hlah maw ka ti. Duhnak cu hihi a
si ko.
“Dawt, nu cu
mu…, samsau hi nan i tlak bik, cun thil hrukeih thiam le tamh thiam hna hi an
rak biapi tuk ve cuh! Muidawh theng hau lo, mah nih sersiamzia thiam a hau.
Lamkal dan, biachim holhrel, umtu hoiher, hawi sinah zohdawhte in thutdir tbk hna hi thiam a hau cuh! Cucu nu cah
thiltha zong si, nunning zong a dawhter, mui zong a dawhter chih" tiin nun
chimh a hmangmif a si. Mah vialte cu mang bantuk an si cang. Caan nih thil
sining a hun thlen. Ton ka duh lomi nicaan ka hun phak cun holh a thiamlo bantuk
in ka kaa pit. Ka dang a ka khar, ka mit a maw. "Tah hladawh hmanh in kan
awi kho lo. Kaa zumh khawh lomi nih caan tampi hna a ka hnawh. Kan dawtding
tluk hmanh in kan dawt manh hlan ah na liam tuan ee".
A mit, a kaa
A hnar, a kutke
Cun, a takpum
Zeizongte an I din.
Lungfiamlo in na
pawngte ah ka rak tap. Mah zong cu na thei ti lo. Bia kan ruahmi zong na ka let
ti lo i na ka zoh fawn lo. A nunnak um ti lo an in ti lio hmanh ah keinih cun
aa hngilh ca’h si kan ti. Kan duh tuk, kan dawt tuk fawn. Hi thil ton lai hi ka
rak theih tung lo. Mang tel in nai langh lo. "Nangmah lo cun ka um kho
lo" na ti tawn kha, atu cu keimah umlo nak hmun ah na kal cang fawn.
Theihthiam a har ko ee, lungfian zong a har hrinhran ko. "Na pawngthut ka
cim hlan ah ziah! Na ka kal tak" tiin ka tang kai cum.
Kan inn cu puai
fate tuahmi ko kan lo. Zingkhua in kan buaicur ko hna. “Thlan kalding cu mah
vial hi maw kan si lai, UHniang na kan zul kho ve lai lo maw?” ti ah UBiak holh
thawng nih kan inn a kheh deng ti awk in. Rose Pangpar senmite cu ka ken i
thlaanlei panh in a nuar ngai in kar khat hnu kar khat, duhsah in a tlami
mitthli hi rauthla tel in na hmu hnga maw? Na thlanlung hmai dir in liamcia
caan khrih in kan lennak hmun hna ruat in kan cuan chungmi chungkhar nuam cu
mitthlam lawng in kan suai khawhmi a rak si ko.
“Umm, zeikar ah dah kumthum timi caan a liam
manh ko” tiin ka thaw ka chuah. Asinain, kan philh lo, nikhat hmanh kan philh
bal lo, cun zeitikhmanh zongah kan philh lai lo, nangmah cu zungzal zatial
tlaihding in valrual lakah kan thim cangmi na rak si.
Na ka pek I na lak than
Keicu,
Hlanhmi lawng ka rak si
A ngeitu ka si lo.
Nangzong ka khualtlung
Men na rak si.
Kum 2006 Oct, 23
ah hi thil a can hi a si “Thit-umnak thuamthil” (Wedding dress) zoh dingin leng
ah kan chuak. Dress cu an i dawh tuk le
fawi tein kai thim kho lo. Mahhi ka duh bak ka ti, cun a dang pakhat an rak put
than, ka duh than, cu ti kai hrukchin thlalang ah kai zoh, ai dawh bik monu ah
kai ruat cu ah cun ka pawng in U Van nih a rak ka nih len. Ka lungthli tum le
ka saduhthah, nu pakhat caah a chan chung ai chim dingmi le a philh ti lo ding
caan cu a sunglawimi a thiangthitumhnak hi a si ko. Cucu, aho paoh nih kan duh
dih ko. A dawh bik in makeup i tuah, siangpahrangnu bantuk in sam i tom le
vanmi bantuk in ai dawh tukmi angki phur ban i hruk ding le mipi hmai le
pathian hmaiah biakamnak van tuah cu ruah ah hin iang a ngei tuk ko. Dress kan zoh dih in
Coffee dawr ah kan lut. Mah dihin Invitation Card kan tuahternak ah va kal rih
ding a si. Mah lio ah cun mibu pakhat kha ka hei hmuh, thil pakhat can dawh a
si “zeidah a cang, an i khawng maw? vun
tho hna uh! A thi pei tamtuk a chuak hi” tiin minung holh ka theihmi kha sii
zung ah nithum ka um hnu ceo in mangcang hlan in ka rak theih.
“kanu, UVan teh,
ziah cycle pei kan i citti kha, khoika dah a um”tiah ka lumen bu he kanu cu a
ban in ka tleih le ka hal, “Theplo in a ka zoh! zeihmanh na thei tak lo maw,
asiloah na ka hal hramhram mi dah si ka fa?” tiin ka nu muihmai a panh ruam lo.
"Wedding dress nan zoh i nan lawipah ah khan motor cycle pakhat he nan I
pah le pei a hmun ah a nunnak a liam cang cu, zei bantuk sii-ai hmanh in kan
thlop manh lo” a ti vial ah a tahbu in leng ah a ka chuah tak.
Ka lunghring, ka
takpum cu kai zoh, ka lu cu an ka tuam. Ka ban hrawng kha vawlei ah runmi
nehnang ka hmuh. Ka ke ka van cawi la ka ti vial ah ai cawi kho loh, ziah! Ka
lau. Nihin hi Wedding kan tuah ding ni silo maw? cu ceo in ka lungfim. Ka room
chungah kai tlum tilo, ka vio, ka au, ka raak len lio ah thinphang ngai in
nurse nu le ka nu nih an van ka zuan hnawh, "Lam kal na ngah rih lo, cun
lungdai tiin na ih ah tha lai" ka hun ka ti pah khin, ka nu lei cu a zoh
le "Zangfahnak tein mizaw hi a dam rih lo caah lungretheihnak nan pek lo
ah tha lai" a hunt i ve. Cuvial ah a ka ihter le nurse nu te cu a chuak.
Ka wedding dress
cu ka zoh i ngam ngal lo in ka tap. Kan i ruahchanmi vialte mitthep kar ah
leidip bang an choi dih. Biakamnak zungbunh (rings), sawmnak ca (invitation
card), vialte kawi le maw hna zong, ramchung ramleng chungkhat sahlawh rualchan
vialte he nuam tein kan hman dingmi wedding cu mang bantuk an si cang ko.
Thlanmuallei
panh in Rose pangpar tom cung ah “Zuun Ngaih Par” timi cakhenh he thungraang
thuhmi kuang hmai ah thildum aa hrukmi nih cun hitin donghnak bia a hlawi,
“Zanmang ah na
ka len
Chunceu
ah thlarau in
Na
ka umpi zungzal” cu caah, na cung ah
kai lawm tuk. Ka nolh than rih lai, kan philh bal lo, ka dawt bikmi.
Atu zong ka
pawngte ah hin rauthla in na dir ve ding ka zumh ko. Na van ka ngai tuk ko lo
maw? Hawikom thar hna na nei maw? Bia kakhat te le lungsiaherhmi te zong na
chim ta manh lo cah na liam sia herh tuk ko lai. Nain, rak ka zum, na hmun cu
hohmanh ka pe hna lai lo.
Lungsak izuam
in, chun le zaan hna hi nikhat hnu nikhat in an sau chin lengmang bang, khoika
lam tel khin zaanriah ei ah na rak lawi hnga maw tiah kan mit thlirh theo. Na
um lonak hmun si thei ko bu in kan kawl. Lungdiriam in caan nih liam pi kho
hnga maw?
Note: Thingthang Mekazin vol.3, No.4, March 2013.