“na kawi le pawl
kha rak chim hna, tuzaan thok in Sung Sung cu ka nungak a si cang. Kan I duh
cang”tiah thawng rak thanh dih cang
hna mu.
Kum (18) hrawng a si lio le atu kum (25) a tlin hnu in
duhnak ka hmuh ning hi caan tam nih tampi a thlen tiin ka hmuh. “duhnak cu
duhnak bantuk in um ko seh! Amah umnak hmun teah amah le a sining tein duhnak
cu chiah si ko seh! Minung sining in a luangmi duhfahnak hakhauhnak le minung
sining in cuai thlai nak a tam tuk ahcun duhnak mui a tlau khomi si. Aho cawn
piak lo le khumh piak lo tein thinlung chungah ai semmi duhnak cu “duhnak” siko
seh. Vawlei thilri le tahchunh chunh hlah sih! duhnak tahfung cu duhnak si ko
seh.
Hawikom dawtu tampi ka ngei, keimah hrimhrim zong hi
hawikomh ka duh tuk. Nu he pa he kai kom. Ka ta bantuk ka U bantuk ka nau
bantuk in ka komh khawh dih ko hna. Ka hawile caah voi tampi ka tap ko, cucu ka
dawt taktak hna ruangah a si. Asinain, mah tluk in ka hawikom pakhat bantuk in
ka dawtmi cu ‘zeitin kan duh’ van ti awk cu a har. Minung sinak in a har,
hawikom sinak in a har.
“hawikom sinak in duhnak kham hlah
Na hawi ka si ruangah duh kho lo ka silo
An duh tu ka si ruangah na hawi ka silo kho lo”
Kum (25) tiang ah mah bantuk dirhmun hi ka tong sual
te lai ti zong ka rat ruat bal lo. Hawikom tampi cu ka ngei ko nain ka duhmi an
si bal lo. Mi khual khua ah mah lawng khusa mi ka si tik ahhin ka dam lo caan
ah ka lunglen caan tbk ahhin ka hawi le pawl hi ka auh theo hna, inn ah zaan
riah chumh hna kan hmang. Cutin, “nun nak” timi cu zalong tein tluang tein a
kal thluahmah ding ah ka ruah ko. Tlangval ngeih lo zongah ‘pasal’ ngeih khawh
siko lo maw? ‘pasal’ ton dingah ‘tlangval’ ngeih theng hau maw? tbk khi ka
hawile he bia elnak kan tuah tawn. Rian nih a kan nenh cio, khua sak tintuk nak
ah zeidong thil kan ruah khawhmi a tlawm te.
“kan duh” thep loin a ka zohtu a mit cu a thial. A lu
a khun, a mit cu cabuai tanglei deng tiang kan hmuh khawh lomi rili tiang maw a cuanh hnga ka thei lo.
“ziah na ka duh khawh” timi bia dah lo chim ding ka
nei ve lo. Hawikom tuk, ai thei tukmi kan si tik ahcun bia leh awk kai harh tuk
ve.
“Kan duhmi hna cu kan duh kan ti ding siko. Na khua
ruah har tuk lai nain keicu hi duhnak
ruang ahhin caan saupi ka rak tuar cang” theih ka tih tukmi bia pawl pakhat hnu
pakhat in a van chim hna.
“na ruahning bantuk ka si theng lai lo dahkaw, na ka
hmuh ning bantuk in na ka ruah sual ahcun caan rau lo teah na lung ai let han
sual lai maw?”
“kan duhnak thinlung he vawlei ah caan hman ka duh.
Nangmah hecun har nak zong ka pah ngam ko lai, lawmhnak zong ton ka duh ko”
Atlawmpal ah Alarm ring le ka vun tho. Lungfim huaha loin ka sam cu ka van itom
le takkholhnak leiah ka lut colh, takkholhnak lei ka kal pahin lunhch box caah
buhbel ka van khing ta duak! Rianrang in ti kai kholh, ummm nizaan ka ih cu pei
tlai tuk cu, zeitin ka lung fim kho rih lo. Nizaan kai chuah ciami nihin hruk
ding ka timi thil cu ka van banh duak le kai hruk. Hmai thuh zeihmanh hua lo,
nihin chun nitlak meeting ai peh ding si caah ka paw khim hmasa hau. Ei awk ka
banh colh, banhla, arti, le bread le Coffee ka ei pah cuahmah cun Nifatin
Thlarau rawl ka rel pah. Nunnak timi cu hihi a si ko. Zarhkhat ah voikhat te
lawng market kalnak caan tha ka ngei. Zarhkhat ca kai cawk cia, tuante in ka
thawh khawh hlei lo caah hin thaizing hruk dingmi hi zaan in kai chuah cia, ih
lai fatin “Diary” ka tial peng fawn.Suimilam (24) hi kai za hrim lo ti ning law
ka palh hnga lo. Hawikom he ton caan,
khual tlung ngeih caan le adangdang appointment kan van ngeih hrim cun zaan
9:00pm ah pei inn ka phak tawn ko. Zeitik caan ah khin dah tlangval he hnangam
lungdai in rawl dawr pakhat khat ah maw? Bar pakhat khat ah maw nuam tein caan
hman khawh timi cu a har in a har.
A thangchomi vawlei ah chan tiluan sinah luan khawh ve
ding in kan pawngkam zoh in mino pakhat nih sersiam a herh tik ahcun “nungak”
kan si rihmi hna hi philh a fawi te mi si. Thlacamnak tbk maw silo ah wedding tbk caan zongah by name
bakin sawm le khawh kan si cang. Kan hawile chungin ‘nau’ va zoh ding tete zong
an um. A kar lak ah tinsih chih in nun a hauhmi le thlakhat phaisa lutmi chung
in zeizat dah kan chuah ter lai timi pawl kong tuak cun thut sawh khawh zong cu si ve hoi lo.
Leng ka chuah khawh bik caan ah ka hawikom he iton si.
Weekend ah zaan riah ei ti hna sih ti zongah ka hawile he thiamthaim kan si.
Zeitik caan paoh ah keimah caah timhcia tein a um zungzalmi le lunglilen in ka
um lio caan ah hnemtu tha ka ngeihmi cu “John” lawng si. Kan kar lakah thil ka
rak fian khawh lomi tampi a um. Cu tluk in ka tlaichan lomi le ka dawt komi cu
“duhnak” a silo ka rak ti peng. Thil pakhat khat ka ton caan zong ah ka hlam
hmasa pengmi le ka mitthlam ah a cuang zungzalmi cu “John” a si.
Phone chawnh ka timh bak ah khin cakuat a rak lut
“zaanlei cu zung ah ram um peng, ka rak in sawm lai zaan riah ei ti sih” timi a
van kuat bak si. Ka chawnh dingmi cu ka let than. “Okey! “ ti vial lawng khi ka
hei leh ko. Tuktak supsap hei chap in tial ve zong ka thiam lo. Cu ti ka thiam
lo zong cu John nih a theih ko.
Esperado
Lake View Hotel roop top Bar!
“ mah nu te ka duh ruang ahhin na hrut cang an ka
ti…..mah nu te ruang ah hin mit kuh cim lo zaan a tam……mah nu te hi kai molh
pi…..duhnak cu tuar a rak har…..” timi hla khi din nawn te in an chuah. Weeked
a silo caah bar thumi an tlawm te. Kan cabuai zong minung pa hnih lawng kan si
ko nain kan thinlung ai hmu mi bang, a lumsa in ka thei.
“Sung Sung, kan duh……..nungak tampi ka ton hna ka komh
hna ka tlaichan ko hna nain nangmah lawng kan duh”
Ka kut a thlir thluahmah, ka tlaih lio mi haileng a
tlak sualnak hnga lo ka thinlung ka ruahnak le ka thazaang dihlak in ka tlaih.
Mualpho ding ah ka ra lo. ‘hihi ka duh cu si maw? ziah mahtin ka um?’ keimah le
keimah kar ah bia halnak a van ra thluahmah.
Cikhat cu thaw chuah loin ka lungtur ai dinmi ka
lawhter ko ee. A luanciami kum (5) chung hawikomh kan sinak vialte ka mitthlam
in ka cuan ter. Zeitluk in dah ka cungah zumhnak le dawtnak le theihthiamnak a
ngeih khawh timi ruat in…
“na kawi le pawl kha rak chim hna, tuzaan thok in Sung
Sung cu ka nungak a si cang. Kan I duh cang”tiah thawng rak thanh dih cang hna mu. Ka hmai ah thisen luang sehlaw ka
lawhter, ka takpum tein ka lin dih cikcek.
“John, kan duh. Nangmah cu zungzal caah kan thim
cang”.
10/6/2017
June Muko Mekazin Issue