Kum (18)
te lawng a si rih ko nain thlalang awn phen in a rak chuak dingmi ni ceu dawh
hmuh khawh nak dingah zeibantuk ruahchannak hmanh a ngei kho ti lo, a pum chung
cancer hrik nih a tuam dih cang. A nunnak kong ah lung dong in a um.
Nikhat
cu a si khawh chungin a nu sinah leng chuahnak nawl a hal le innhmai lam pawng
tiang khi a va chuak. Kum caan sau tuk inn khan chung lawng te ah a um tikah a
tu bantuk in leng a hun chuah i zalong te le lunglawm tein zalam cungah lam a
lengmi hna a hmuh tik hna ah a thinlung cu hngar nak nih a phanh ve.
Khua a
hoi len lio ahhin tap phel zuarnak dawr chung ahcun a va lut. Counter hmaiah a
rak thumi ngaknu dawh te a hmuh tikah cun a thinlung cerhti put chungin ti let
a tho.
A voikhat
hmuhnak bakin duhnak timi cu a mah tein a hung ra thluahmah ko. Dawr chung a
rak lutmi cu, mirh bu te khin “zeidah na herh”tiah lung lawm tein ngaknu te nih
a van chawnh.
A muisam
le pumrua he ai rup tukmi a aw hnemte a van theih cun, zeibantuk tap phel a lak
zong ai theih lo bu khin a pek. “tap phel dang kan hmuhsak rih lai maw” timi
nungak nu bia zong ruat cungcang loin a lu a van suk. Panh siarmar tein a mirh
mui a zoh sin, a pum chung cancer hrih hna
khoi an zam a thei lo.
Cutin, a
thihnak ding ni le thla hmanh a theih cang, a ruahchannak hna zong an zor
thluahmah lio ah nun pehsauh tu thil pakhat a hmuh asi. A nganfahnak vialte cu
a thuh dih hna, smart takin thil ai hruk, a serh i zaanlei fatin zalam a leng
tawn nain a rak tin fatin a kut in tap phel pakhat khi a rak tin pi tawn,
lunglawmhnak mitthmai he a rak tinmi a fa pa a hmuh tik ahcun a nu zong a lawm
tuk ve. Tap phel cawk ruah ah leng chuah lai hi a ngaih kho tuk, vanram kai lai
bang.
Thinlung
kuang nih a zawi khawh lo tiangin a dawtnak tikuang cu a liam in a liam ko
hmanh sehlaw “kan duh” ka ti tikah rak ka cohlang hlah sehlaw timi a ruah ah a
zenh tuk. Tihphannak nih a thuam. Santlaihnak a ngeih lo tham ahcun phuan lo
tein um ninglaw cucu a tha deuh ko lo maw? A mitthlam in a hmuh lengmang mi cu
ngaknu a nih lio te kha si peng ko. Nain, a nih lio va hmuh than ding zongah
thazang a chuak kho ti lo. Thlan lei panh in a nunnak thaw chuah thawng hna cu
zingkhat hnu zingkhat in an zor thluahmah ee.
Zaanlei
fatin tap phel cawk ah a rak tawnmi tlangval pa te cu a lung chung in a hei
hngak peng ko. Nihin he cun tlangval pa te a rat tilo nak hi ni (3) a si cang.
Cutin, tlangval pa kong a ruah lio ahcun cabuai cung in phone a ring. Tlangval
pa a nu sin in si. “ka fapa nih thlanmual a kan liam tak cang” a ti. “a fapa
nih a duh tuk ko nain a chimh ngam lo nak kong, zaanlei fatin tap phel a rak
cawk tawnmi kong cu ngaknu te hmuh duhn ruang a si kong, tap phel a cawkmi zong
ngaknu te nih a fun ning tein bizu chungah atu tiang samh lo zoh lo te in a
chiahnak kong pawl a chimh tik ahcun” ngaknu te cu a tap thluahmah.
Tlangval
pa te a liam hnu ni tlawmpal ah khan a nu cu a fa pa ihnak khan chungah a va
lut. A fapa nih a rak tleihchan tukmi thilri pawl kha pakhat hnu pakhat in a
tang cung ah ai pom, zuunngai in a tap. Ahnu bik ahcun a thlahtem ai phoih rih
lomi tap phel cu a hun zoh. Ngaknu hmuh
duh ah tap phel lawng a rak cawk tawn nain tap phel cu a cawknak ning tein bizu
ah a fim tawn, cucu a nu nih cun samh hna. Tap phel bawm chungah muici tling in
catlap fa tete ai bil mi cu a hun samh duahmah. Khuaruahhar thil pawl a van
hmuh hna.
Muici
catlap cung ah tialmi hna cu-
“ zeitindah na min an in auh? A thianghlim
tukmi na mit kan zoh sin komh kan duh”
“zeihmanh na ka let lo, komh na ka duh ve lo
maw?”
“na ka zoh ning ahcun komh na ka duh ko rua ka
ti. Zeihmanh na ka let fawn lo”
“zaanleicu rak ka dong ca. Nihin cu thlahlawh
kan chuah ni si. Changrau kan ei ti lai”
“Tulio cu na mithmai a panh lo tuk cun na
hmaivun pawl zong vutcam bantuk in an rang dih. Rak ka let hme”
“Duhdawtnak timi cu zeiset dah a simi ti ka
fiang kho lo nan a thlianghlim tukmi na mithmai kha ka tlaihchan ee. Nu ka si
ruangah mahtin bia ka chimmi hi zohdawh lo a si kho men. Asinain, kan dawtnak
an theih khawh vial kha kai lungsak asi. Chawnh zong na ka chawn duh lo ka
theih ko. Ahnu ahcun ca ka rak tial ti lai lo mu…”
Catlap
cu a tlaih i ngui ngui thlak in a nu cu a tap. Ka fapa te nihhin mah ca pawl hi
rak rel sehlaw a nunkhua hmanh a samh khawh hnga mu a ti. Vawleiah duhdawt tu a
ngeih hi i thei ta manh sehlaw timi a ruah ah a thin mei a alh. Atu ahcun,
pakhat le pakhat an iduh ko nain dawtnak kuang an khahter manh lo ruangah nihin
thil a can ati.
Careltu
hna,
“mi pakhat na duh a si ahcun raltha tein kan
duh rak ti ko mu. An cohlan khawh lo zongah ningzahnak hna phenh khawh izuam
law…..na thinlung tu duhdawtnak he nunter hram. Caan a liam hlan ah dawtnak
kuang khahter. Thaizing timi cu a fiangmi silo, a fiangmi nihin ah dawtnak
kuang khahter.
Credit: GandaWin