Nu pakhat ka si, nungak note ka si fawn. Duhdawtnak he
pehtlai in pa pakhat cung ah bia khiahnak tuahnak nawl ka ngei. Tlangval ka
ngei kho, tlangval zong ka phiat khawh, tlangval he phone, sms kai chawn kho in
kai text kho. Tlangval he lam zong kan leng kho, duh bia zong kan phai kho.
Nain, ka pasal ca ding tiang ka duhmi pa pakhat cohlan ding ah ka chungkhar, a
bik in ka nu theihter ta ka duh. Ka chungkhar, ka tta, ka U ka pi le ka pu he
zong tleihchannak ngei hna she tiah theihternak tuah ka duh. Voi tampi kai zuam
nain caan ai relrem lo ruang ah a tlamtling kho lo. Aruang cu, ka duh tukmi pa,
kum 3 rori online chung in ai dawmi kan si tik ah, zeitik dah ka chungle , ka
nu hmai ah ka chuahpi lai ka ti. Ahnu ah khua ka ruah thanmi cu solsel awk um
lo bakmi a hmanthlak pakhat ka print lai i a hmasa bik ah ka nu ka hmuhter lai.
Cun, a chungkhar, le ka tlangval pa sining, a sianginn kaimi, a riantuanmi tbk
tiang kha huamsam tein chimh kai tim. Hi, a tlamtlin khawhnak hnga ding zong ah
hin zaan fatin thla ka cam zungzal. Ka dawtmi zong tha tein ka chimh. Ka
chungkhar he introduce kan tiah lai ka ti I “Ok” tiah a ka leh ve.
Zei bantuk thil
ka tuah hmanh ah a hmasabik ah ka nu ka theihter peng. A hmasa bik tlangval ka
rak ngeih zong ah theihternak ka rak
tuah hna, lungkuai in ka um lio zong ah “amah nak tha, a tlingmi
tlangval na ton than ko lai” tiah a rak ka hnemh. Cu ca’h ka nu he pehtlai in
zei thil hmanh ka thup lo. Ka tlangval pa he bia kan I ruahmi zong theihter awk
hnga a timi cu ka chimh than dih. Ka life ah bia khiahnak sang bik mi pawl hi
ka nu ka theihter hmasa bik. Mah bantuk kong pawl ka chimh lo caan kar lak
hmanh a mah nih a ka hal tawn, “ na Dl he nan sinpi maw? tu kar hrawng zeidah a
tuah bik tawn tbk” hi hal a hmang. A fa nu dawt ka si tik ah, ka fa hi a ho he
dah an i duh, khoi ka dah a kal, tbk in a mit a ka thlirh tawn.
Nihin hi weekend
si, VZO in ka dawt he kan I chawnh ni si. Inn chung te ah wifi he kai hawikomh
ni a si nain rawl chuannak ah ka nu aw aan ka ngai. Bia ka chim hlan in, zeidah
ka herh? Zeidah ka duh? zeidah ka chim lai? timi a theihcia dih. Nihin zong ka
nu nih bia lam a ka sial piak hmasa.
A min ah Thawng
Cung Lian a si. Thawng Thawng tiin an auhnak kong. Cun, Bible sianginn kaimi a
si nak kong, a chungkhar cu thantlang ah khuasa mi an si nak kong pawl ka hei
chimh. Mah ah cun ka nu nih “na ngakchiat te in na pasal ca ding ah kan duh
piakmi cu Bible sianginn a kaimi, Pastor a tuan te ding hi saduh kan thah
piakmi a si zungzal le a tu cu Pathian nih ka thlacamnak a ka leh ko cuh! Tha
ko, Bible sianginn kaimi hna a si ah cun mitha te a si ko lai, nanngmah zong an
dawt ko lai” a rak ka ti. Ka nu hi mah tluk in a zia tha lai tiah ka ruat bak
lo. Tuchan ah, cathiam, hla sak thiam, muidawh minthang tlangval um hna na lak
ah Bible sianginn kaimi hna cu na duh, a chim chap lo ah online in nan I duh
fawn ti phun in a ka sik te ding lawng ka bawh.
Nu Pakhat ka si
ko na te in ka pasal ca tiang ka duhmi tlangval pakhat cung ah ka chungkhar, ka
nu hmanh ka theihter ngam. A ngaite ti cun, hi thil hi a fawi bak lomi si.
Tuchan ah online cu hlennak hmur thur bawm pakhat bantuk ah an ser, cucu ka nu
nih a theih ko nain zei ruang ah ka duhmi pa pakhat cung ah ka lungfah lai phan
in a lu a ka thluk piak hnga. Duhdawtnak kong he pehtlai in pa nak in nu hi kan
lungthiang deuh, lenglang in bia kan chim ngam, kan langhter ngam a tu keimah
bak in kai fiang. Thawng Thawng nih teh a chungkhar sin ah ‘ka nungak ti in
maw? silo ka hawinu ti in dah?’ theihternak a rak ka tuah le tuah lo zong ka
thei lo. Hramhram in fial zong ka duh lo. Nu pakhat ka si nain ziah! mah tluk
tiang ka ral that hnga timi bia hal nak hi a um zungzal.
First semester
exam a neih deuhdeuh, ka online deuhdeuh, chawn lo in ka um kho lo deuhdeuh,
summer holyday zong a nai deuhdeuh, Thawng Thawng he ton nak ni zong a nai
deuhdeuh. Ca zoh kho lo in zaan tampi cu sivang in ka um tawn. Kum 3 chung a
mihring ka hmuh bal lomi he Thantlang khua ah van I ton ding ka ruah ah ka
busik saisem a chuak. Ka ruahchan bantuk in a mui chia sehlaw,ma holh hna pei
sehlaw, a lam kal hna kawi sehlaw, cu bu cun ka duh kho thiam hnga maw? a leng
ah teh Online chung ah kan I duh bantuk tein kan I duh kho hnga maw? kan I
duhnak hi a zor hnga maw? a sang chin hnga dah? Tiin khua phunphun ka ruat.
Keimah lei kai zoh, mi taksa tha cu ka silo, muichia, muidawh zong ka si fawn
lo. Pum rua tha ngai zong ka si fawn lo. Amah nih teh ka hmanthlak zoh nak ah
hin model, actress pakhat bantuk in a rak zoh sual si cun, ruahchan ning le
hmuhning ai dan tik ah a lung ai let than sual hnga maw? ka hawikom, ka
chungkhar nih ka tlangval pa kong cu an theih dih fawn. A rauh hlan ah sang le
zawl, kan church mino tbk nih an hun theih lai. Mah vialte nih an kan theihdih
tik ah hei i duh kho hlah sihlaw, fak tuk in ka tuar nak hnga lo thazaang thawn
ngai ka hau hnga timi khur khua ping le pang lo ka ruat. ka ca buai cung ah cun
ka thu ko, ka hmaika ah cun cauk cu ka hei chiah, ka thinlung cu thantlang phak
chel, Uthawng sin phak chel, Dagon university phak chel, Bus car cung phak chel
cu ti cun first semester break cu a hun phan.
Keimahnak tuan
deuh ah UThawng cu Thantlang a rak phan cang. “Kahawi le ruahnak ah cun Hakha
tiang tel cycle in a rak in dong lai lo maw? mah le nungak te khual lam hla rak tlungmi cu don phung pei si” tiah an
ka capo tawn. Nain, kan dong lai a ka ti lo, rak ka dong ti ka duh ve fawn lo. "Khua
phak tik tu ah I hmu te ko sih ka hei ti". Thantlang cu ka hung phan,
nihnih ka cam chung ah voikhat te zong kan inn ah a rak ka leng rih lo. Kanu
zong a khuaruah har ngai, keimah zong cu dawr ka hngak peng, ka phone GSM cu
thantlang ah network tha ti lo I kan I chawn kho lo. Ni fatin, dawr ka hngah
pah in ka mit thlirh. Kan dawr hmai hna ah a ra hnga maw? a ka hmu lo sual lai
ti phan ah inn leng in dawr ka hngak tawn.
Satday zaan ah a
rak kan leng, mah ah cun zuu rim ka theih. Ka lau tuk. Kanu nih zuu din a duh
lo, abik in a nih cu Bible sianginn kaimi zong a si tik ah zuu a din ka duh lo.
Cu ti cun, sau hmanh thu lo in bia kan vai I ruah i 10:00pm ah a lawi. Cun,
ahmaizarh ah dawr ah a rak ka leng, online bantuk in kan bia ruah a thlo kho bak lo. Bia a chim a hin
ai bia tak lomi ka lawh ter, umdan, a hoiter, a hmurka thlumal lo zia tbk pawl
ka hawile sin ka chimh tawn ah hin piat ko. ‘An duh tak lo le si ko cuh’an ka
tit awn. Nain, ka phiat kho lo, phiat ding ah ka duhmi zong a si fawn lo.
Zeitin a um paoh ah ka ngeihthiam khawh peng. Nain, thlapa thlahnih chung
thantlang kan um tti chung ah voi 5 lawng kan i tong. Cu ah cun bia ka hal
‘siangsiang te inn ah chun he zaan he a um peng an in ti, nan I duh lo ah cun
mah tluk in an inn ah na um awk silo”tiah ka rak hal tawn. ‘nan i duh ah cun tha tein chim, zei tik caan paoh
ah kan thlah khawh’ ka rak ti lio hmanh ah ‘zeitin, fa khat ngei cu ka duh
khawh lai’ tiah a ka rak leh. Bia tampi ka theih lengmang, keimah maw?
siangsiang dah? Hodah a nungak kan si. Kan pa hnih in maw kemhmi kan si hnga.
Ka nu hmai ah bel nang ka thluh tluk si cang.
Ka duhmi
duhdawtnak cu, ka pawngte ah chun he zaan he ka duhmi, ka herhmi a ka tuah piak
lai. Ka chungkhar a upat hna lai, ka rualchan a dawt hna lai. Keimah hrimhrim a
ka duh lai. Keimah lo in a um kholo mi, ka retheih a siang lomi, ngeihchiat ter
zong siang lomi a si lai tiah ka ruah. Nain, keimah nih zei paoh chimh cawn
piak, hal hmasa, chim hmasa, tuah hmasa a hau peng. Mitcaw bantuk, hna chet
bantuk in ka um hnawh. Ka tai ah ai awk,
cawl kho lo in a ka reh. A duhmi paoh ka tlinh piak seh ti mithmai in a ka zoh.
Van le vawlei bantuk in ai dang. Keimah he kan I duh hlan in maw, siangsiang he
an I duh cang, silo ah keimah he kan I duh bu ah dah siangsiang he an I duh.
Hodah duh hmasa le duh hmadung kan si ne. Ka huat tuk cang, vawlei cung ah ka
huat tukmi pa pakhat na si cang.
Thantlang in
Yangon lei ah sianginn kai ding ka rak i thawh lio ah ka hawinu nih ‘siangsiang
le Thawng Thawng an zam’ ti thawng a hun
ka chimh. Motor cung hin zuan bak ka lung ah chuak. Thaw chuahlo, mit thep lo
in caan sau nawn lenglei ka zoh. Zei khua ka ruat ti awk zong ka thei lo. Zeiruang
ah, thantlang ka chuahtak ni thengmang ah nupi a neih, zeiruang ah a rak ka duh
tak lomi kan duh a ka ti, zeiruang ah siangsiang tham cu ka komh sawhmi si a
rak ka ti, zeiruang ah nangmah hi a pakhat nak le a donghnak na si a rak ka ti.
Zeiruang ah,,, zeiruang ah..zeiruang ah na velhle kai zumh. Lungfim lo in
Yangon ka phan, ka tha uai dih. Ka celh hrim lo. Zuun ngaih si lung lilen si,
innleng ka chuah chel, inn chung ka luh chel, ka khuaruah ning ai thenthek dih.
Ka mit thlam ah ka nu duk tiah a cuang “ka tlangval pa nih nupi a ka ngeihtak
va si kaw, ka thinlung hmape a ka thlop huam ti hnga maw? ka nu tel nih
thazaang a ka pek lo cun ningzah, ningtih in ka thih ding a fiang. Ka nu cu
zeizong vialte a ka theithiam tu, ka nu sin ah cun zei hmanh thup lo tein ka
chimh, a ka ruahpi a ka tuarpi, ruahnak a ka cheuh. Ka nu tuzaan cu kan ngai
tuk, kan hlam tuk, nangmah lawnglawng nih ka sining na theih dih, ka duhmi zong
na theih dih, kan herh tuk ee hi khur chung in ka chuah khawhnak hnga.
Ni tampi, zaan
tampi philh khawh kai zuam. Kum 3 chung kan cakuat pawl ka rel zaan kha dah
lungfah ka celh lo cem si hnga? Silo ah laksawng a ka kuatmi pawl ka zoh than
ah khan dah ka lungkuai deuh hnga? A thlianghlim tukmi ka thinlung na hlen, na
velhle in na tuam, a thianglim tukmi thinlung in kan duh ve, Sicun, hodah palh
hnga? Na velhle ai zumh sualmi keimah maw? silo ah partha dang tang a pommi
nangmah dah? Cakuat zong rak tial ti hlah, na chungkhar thar ah lung nuam in um
ko. Na thaisung kha daw law, keicu na sia herh hrim hlah. Nangmah bantuk kan co
lo hi Zingnu khuakhan tu si hram seh law, mithmai panhte tu in, lam ton ah
hrial khawh i zuam sih mu. Caan sin ah
lawmhnak, zuun ngaihnak, tahnak hna liam in thinlung thar, len limcia cu
lungsiaherh in mangtha kan cah.