Christmas a dih bakin laitlang leiah ka thiltom he ka hawinu Christabell
Par Chin @ Bell te, kei nihcun Kawi Chin tiah ka auhmi Yangon Nuam Sup Gorup i
kan chairwoman a si mi a pasal neih puai zawh lawng silo in Maw tuan bak ah kai
thawh colh. Atu hi khual lam hla ah ka voikhatnak maw tuan a si nain Yangon
ahcun voihnih khel te maw ka rak tuan bal cang. Mawtaw kai cit ko bu ah vawlei
dip nih a ka tuam dih ko. Aruangcu, lam an kauh lio pi a si tikah khualtlawngmi
kan tam he ai ton tikah bag chung i ka khumhmi ka thilphuan chung tiangin
vawleidip an lut. Kan mawtaw belte kan ilawng ngai. Ai citmi kan lawm te.
Yangon ahcun aho paoh caan chianti dah tilo, thatni ah hincun caan pek
khawh timi hi a har ngai. Caan ipek khawh hi a sunglawi tuk. Abik in a tu
bantuk thitumhnak tbk le thlacamnak le peng le tlang puai tbk ahhin i manh
ngaingai lo ahcun kal a fawi lo. Cun, khuapi ahcun thitumhnak kan tuah tik zong
ahhin direct phun le a fawizang nakin tuah hi a tam deuh. Aruangcu midang kha va
hnursuan tuk le hna va hnawh tuk kha hohmanh duh cio a si rua lo. Nain, tutan
laitlang maw ka tuan ahcun phung le lam nih a ngeihmi le laimi nih a thiang
thitumhnak kan sunhsak ning le kan upat ning le man kan ngeihter ning tampi ka
hmuh khawh. Cutik ah, keimah hrimhrim zong laiphung le lam te’n a thiang
thitumhnak tuah cu ka upat in kan tlaichan ngai ve. Nain, thil pakhat a ummi tu
cu kan puai tuahmi hi kan ngeihchiat nih a zawh lo leng tiang le leiba ngei
tiangin kan tuah sual maw timi a ka ruat ter. Aruangcu, kan chunhthahmi le salu
kan hlohmi a tlawmte lo. Laitlang a si tikah chungkhat cingla rualchan le dawtu
tamnak hmun a si tikah rawl dum ttinak timi hi bi tein tuah khawh zong a fawimi
thil a silo tikah ngeihchiah a dih ngai ding in a um.
1. Thantlang
Mino
Ka mawnu Chin Chin @ Kawi Chin hi thantlang ahcun AG khrih fabu a si.
Yangon Lai Baptist Church a si. Amah zong hi thantlang a umnak in Yangon ah a
um deuhmi le khuasa deuhmi a si. Nain, puai lai zaan ah thantlang nungak
tlangval cu a nih bu, kha bu ti um loin thitumhnak hla remh cawn ah inn khat
nih tlum lo tiang in an rak chuak. Cu nihcun tampi nun a ka chim tiah ka hmuh.
Hi hla remh cawnnak nihin mino pakhat le pakhat kar lakah hawikomhnak le
dawtnak le lungkhat thinkhat sinak a langhter tiin ka hmuh fawn. Ka maw nu an
dawt lawng silo in Pathian an dawt zong a si. Mino hna an lung ai rual ning le
thazang an chuahmi ka hmuh tikah upat lo le lawmh loin ka um kho lo. Cucu mino
nih kan i ken peng awkah ka duh ngai. Hla cawn lio zongah a herh loin a holhmi
le ai capo mi zong kan um lo. Cawn caan ah kan cawng, sak caan ah kan sa, dinh
caan ah kan idin i ei caan ah kan ei tti hna. Mah zaan kha hla cawn kha cu
keimah holh cun “thlarau” a tla bak ka ti. Tuzaan hla cawnnak ahhin AG zong
umlo, Baptist zong um lo, Believer zong um lo.
2.
A
thiangthitumhnak
Ahmasa bikah U Bawi & Chin Chin kan lawmhpi tuk hna. Atu bantuk in
Biakinn khat in a rak in lawmhpi mi hna le ramleng ah alang in a rak in cuanmi
hna le Pathian hmaiah zohchunh tlak tein a thiang thitumhnak nan tuah khawh
caah a hleiin kan lawmhpi tuk hna. An puai lai hrawng kha sawmnak ca tial le
zeidang wedding ca a herhmi thil cawk le zalh ah kan buai ngai lio ahkhan kan
hawipa pakhat nih “Kawi Chin, a zaam in nan rak zaam lawlaw ko lo. A buai
thlakmi le tuah ding le a liaoheu dingmi phaisa pei a tam tuk hi” tiah a rak
capo hna. Nain, thlapa cuangmi puanrang ai hrukmi ngaknu thiang cu a pa nih a
ban in a van hruai i, ringawn an tummi he ai tlakmi an ke kar an hlan bu cun
Biakinn thiang chungah Pathian le mipi hmaiah a thiangthitumhnak kutsih
lehthahnak an tuahmi hi zeitluk lunglawmh awk dah a si. Nihin ahhin, phaisa in
minung tha le zang in chaw le va in caan pek in tuahmi asi. Kam khat lei
ruahcun thilhar ngai a si. Nain, a theipar cu ai dawh tuk.
3.
Nu
Kai ( Monu Kan thlah)
Shwe Myo Daw rawl dawr cun kan hung thum thluahmah. Kawi Chin kehlai ahcun ka dir ko. Tlawmpal
kan hung kal deuh ah khin ‘ Monu cu a pi le a ni nih hmai deuh ah van kal pi
hna she’ an ti. Kan hmailei deuh ah khin vanmi hlaremh bu nih monu cu an rak
hngah ko. “lunglawm te’n kan in don monu,kan
ruun inn rep lo te ahhin rung lut law… van thluachuah lei thluachuah luhpi law …… Pathian nih
thluachuah in pe ko seh” timi hla cu an van remh. Mitthli cu khoika tisor in an
rak luan ka thei lo. Ka mawnu cu a tap tuk cang. Ka mit cu cholei ah ka mer ve.
Tlawmpal ah mopa a nu nih lai cawngnak puan eihnak in a vun don i mopa nih
pangpar a hun pek le inn cungah kan kai.
Kumthar
Ruahlo taktak in monu thlah pahcun Hakha ah kum kan thar. Kum thar kan
hmang. Puai sunglawi ni ah dawtnak an langh termi laksawng kan phaoh hna.
Lunglawmhnak in kan khat. Ka lungthli in ka ruahmi cu ‘aw…..hi bantuk ni
sunglawi ahhin dah mu…a kan daw taktakmi hna min cazin cu kan rel khawh hnga’
ka ti. Caan kan i pek pinah thluahchuah kan ihrawm i, chaw le va le thilri
zongin kan dawtnak kan langhter khawh caan a si. Zaan riah kan ei dihin
Thantlang leiah kan choi vurmar ne ai.
Nupi thit timi le va ngeih timi hi a rak din tuai hrim lo. Chawva lawng
silo in innpa chakthlang zong kan hnuar suan ngai hna. A fawinak cun mi re kan
theih tuk hna kan ti lai cu. Asinain, laiphung tein le laidan tein nupi thit
pasal ngeih cu a rak sunglawi bak ko. Abik in, lairam, kan ram tein kan
laiphung tein a thiangthitumhnak tuah cu a sunglawi tuk. Ka sunsak tuk fawn.
U Bawi & Kawi Chin
Bawipa nih vawlei thluachuah le van thluachuah in pe hna sehlaw fanu
fapa in pom cawiter ko hna seh! Nan tarhnu nan sampar tiang samhri in sih ko
hna she” tiah thlaza kan cam piak hna.
1/6/2017