January
Ni 11
Ka nunnak ah ka
tummi thil lian ngan cu Pathian gnih htule caan sinah vancung in a ka thlak
cang. Ka kupthil rual hawi sinah le ka chungkhar sinah keimah thinlung chung in
mithar (nau sem) a chuak cang. Caan saupi a rak kekkuai mi le fimhlawm awk
hmanh a rak rem ti lomi le duhdawtnak ruangah hma le rung he caan saupi khua ka
sak hnu in a tu cu lam thar ah dawtmi thar he ruahchannak seh chih in harsatnak
vialte kan ton ngam dingah chunmang he kum 4 a liam cang.
“kum (4) chung
dawh kan i duh cang hih! Na thinlung he ai hlatnak ah rak ka chia hlah”
“kan chia lo,
nangmah tein na kal zungzal. Zeitluk in kan duh cu na theih ko si”
Thitumh ding
tiangin bia tiam kan ngei. Hmaikum sianginn a dih cun chungkhar thar dirh ding
zong timh lamhnak kan ngei cang. Ka chungkhar he nuam tein khuasak ka duh tuk
komi hmanh kawlram ah ni le caan rel in
amah ka hngak.
“Jenny, he
nizaan nan itong maw?”
“ziah hme kan
iton lai. Kan iton nak ding kong le lam zong pakhat hmanh a um lo.”
“awhrang in ka
let duh hlah, bia tlawmte ka chim zongah na awhrang colh peng”
“Jenny cu na
hawinu si. Na dawt tukmi le na zumh tukmi hawi asi. Sianginn kai tti zong nan
si. Kum zeizat dah kan iduh cang ti zong a thei tu si. Zeitluk in kan duh le
kan dawt ti zong a thei tu si. Mah bantuk minung he cun zeitin kai date zia
lai……”
“silo, ka ngai
thiam” a bia cu ka tan. Ka thinlung nih khin thil ai thupmi thei sehlaw ka lawh
ter. Zeitluk in ka thinhun caan zongah ka palh lo ti kai theih ko bu zongah
‘ngaihthiam ka hal hmasa peng’ tlamtling sih! Then loin Pathian sam hri sih si
uh sih! ti cu ka duh zungzal mi a si.
Jenny: ka
hawikom tha pakhat. Kum 4 chung sianginn kai ttimi ka hawi. Ka ngaihchiat caan
le kai lawmh caan ni fatin ka ton mi thil vialte ka chimh i a thei dihtu le ka
bochanmi le ka tlaichanmi. A tlawm ah siseh a tam ah siseh ka kaa chung i a lut
dingmi thil fate zong ai cheumi kan si. Nain, nihin ahcun ka caah zumh awk
tlakmi a si ti lo.
Samuel: Kum pi kum (4) chung ka thinlung, ka nunnak, ka thazang, ka
ruahnak le ka zeizong vial tein ka duhmi tlangval pakhat. Sianginn a kai chung
vialte lungsau le lundang ngei lo in ka rak hngahmi tlangval pakhat. Ka nau le
he hmunkhat teah ramthum nak ah khua sa ding kan si ko nain Samuel kai thim
ruangah kawlram ah ka tang. Nain, ruahchannak mimmei cu nizaan khan a tian dih
cang.
“nang na kal hnu cun ruahpi sur lak lawng ah kai chawk
cang lai
Ka mitthli hi hohmanh nih hmu ti hna hlah seh” (CP
Lian C)
Ni (7) chung inn khan pakhat chung ah niceu hmu loin khua ka sa cang. Ka
thil hmuhmi ruangah ka thinlung lawng silo in ka pum zong a zawt chih cang.
Ruat loin ka um lai ka ti zongah ka tlaih liomi ka phone ka cun tlaih in ka
mitthla le Samuel ai then kho lo. Zing ni ceu dawh le Samuel ai then kho lo, ka
ei dingmi ti le rawl nakin Samuel hi ka thazang le ka nunnak changreu a rak si
deuh ti ka hun i fiang chin lengmang. Deilei 3:00am tiang hna ka mit chin kho
loin a um caan a tam pi.
Ka hawinu Emily nih zaanlei fatin plastic zaal in a rak phir pahmi
“Myanmar Beer” lang thum ka din ta locun kai hngilh kho ti lo. Lang khat hnu
langkhat, a chung ummi ti cu ka pum chung ah ka van rawn, ka kut thla a thlir
thluahmah. Tlawmpal ah
“ma cang! Beer din loin hngilh khawh izuam” a van ka ti pah khin, ka din
cuahmah mi ka hmur he ai tong lio mi cu a van ka chuh. Ka thaw chuah cu a suk
bakin ai su. Zeitin tuah awk le um awk khi ka thei ve lo. Beer ka din ta lo le
kai hngilh kho fawn lo. Rawl nih le ka ei kho fawn lo. Ka tah thawng zong a dai
kho hlei lo.
“ka pe lawlaw ko” ka van ti. Ni zeizat chung khi dek a thin ai sum buin
a rak ka zoh cang hnga ka ti. Tuzaan cu ai tuar ti lo i Emily zong cu ka hram
ah a tap ve.
“zeidah na ton. Zei ton dah na ton” tiah mah tluk tha le zaang a ngei
lomi cu ka keng ah a hunk a cumh thluahmah. Ka samfang pakhat hnu pakhat in an hun pawih, ka mit in ka cal an
hun khuh dih, a haan kho lomi ka mitthli hna he ai ruang in zelttuang ah an
tla.
“Keicu ka tahnak caan a sau tuk cang
Mitthli he ni le thla ka relnak a sau tuk cang” ti ka chim pah cun, ‘
mah bantuk bia kha chim ti hlah, an phu lo. Na dawtnak he zong ai tlak lo’ a
hun chap rih.
“ka thazang ngeih dihlak chuah in a tai cun ka tlaih. Kan thlah kho lo,
‘ngaihthiam kan halmi ka let ta”tiah ka nawl.
Caan sau nawn, lam kam ahcun kan dir cang. Vawlei ah a rilmi a sop dihin
a denmi ka phone zong a tlaknak hmun ah a um ko rih.
A kut lum tein ka kut cu a tang cungah a van thial,
“Dawt, thinlung ngei lomi ah maw na ka rel” a van ka ti. Ka tah tuk nak
ahhin ka holh kho lo, a let zong ka let kho lo. Ka lu ka suk. Kan holh kho veve
lo. A tap tuk ve. Nain, kan phuan ngam lomi biafang pawl cu mitthli sinah thil
chih an si cang.
“Na thinlung he ai hlatnak ah rak ka chia ti hlah mu, kan duh bik ko” a
ti. Motor inn khar a hun ka on piak. Seatbelt a van ka tuah piak. Thil kan
tonmi kongah ka lungtur a dai kho hlei rih lo. Phone sim card cu kai ken, ka
phaisa bawm ah ka sanh. Inn lei kal
loin, phone dawr ah a lut.
“phone cawknak phaisa ka nei lo. Um rih ko seh” ka ti.
“si hlah, phone neih lo hin um ninglaw zeidah a lawh reng hnga”
“herh lomi na chim tuk. PCO chan zong si tilo, phone na neih locun
zeitin dah kan ichawnh khawh lai”
“si ve tak ti” J
Ni fatin te hi, lunghrinh mit in ka zoh. Lam hla i kan um caan zong
ahkhin ka thinphang. Ka um lo kar ah thil pakhat khat a cang sual lai ti ka
phang. Voidang ahcun weekend paoh ah zaan riah kan ei tti mi kha caan pek tuk
ah k arak i ruah, amah zong rian he keizong sianginn he ka si tikah weekend
lawng hi caan kan hman tti khawh si. Nain, cucu a rak za tukmi le a tling tukmi
le caan nuam tuk ah ka rak rauh nain a tu ahcun zaanlei fatin te iton lawng ka
duh cang. Ka theih lo kar in Jenny he an itong lai ti rumro ka phang. Ka ruat
tuk nak ahkhin ka lu hi phuah hnik ai tim cang.
Sianginn ka lawi pah, bus cungin ka tum bak ah khin message pakhat a
lut.
“Dawt, tuzaan cu kan itong kho ti lai lo. Ka hawile he dawr ah kan thu”
mah message kuatmi ka rel pahcun khua phunphun khi ka ruat. ‘Jenney ah leng an
chuah ti le si ko lai’timi ruahnak khi ka thinlung chungin a hong chuak colh.
“sicun, ka ra ve lai. Kan ngai tuk” ka ti. Tlawmpal kai ruat than.
Message ka kuat than.
“Jenny he kan itong si ko lo maw? tuzaan hi nai manh lonak ding a ruang
ka thei lo”tiah ka kuat. A ka let lo. Inn ka phakin a van ka call.
‘ka hawile pa lawng te an si. Nai nuam lai lo ti ka phang. Cun, Jenny hi
na hawinu si. Zeitin a mah cu ka duh khawh lai. Hikong ahcun rak ka zum ko. Na
cungah kan duhdawtnak pakhat hmanh a zor hlei lo’ a ka ti.
Phone kai chawnh pahcun ka thahri pakhat hnu pakhat pawih sehlaw ka
lawhter. Ka zaal cu tuang ah ka hlonh. Ihnak cungah kai hlonh ve. Khua tampi ka
ruat. 8:00pm tiang phone ka callmi a tlai ti lo. Jenney phone zong ka call, a
tlai ve hlei lo. Tlawmpal ah Emily nih innkhar a on thawng ka van theih.
“zei na ti lai”
“Samuel le Jenny kawl ah kai thawh lai”
“mihruk bantuk in um hlah, yangon khua chung mah tluk kau mi hi zeitin
na hmuh khawh hna lai. Zaan zong a tlai cang. Na caah tha lo”
“ka thinlung nih an umnak a theih ko. Samuel cu ka thinlung chung ahhme
a um cu. Ka cungah zumh awktlak an si lo ning hi ka mit in va hmu lawlaw ning.
Cun, nangmah zong nih thei ve lawlaw”
“Samuel hi lungrumh mit in na zoh tuk le si. Jenney zong cu na hawi si.
Nan kar lakah mah tiangtiang in khua ruat kho lo a si lai lo ee”
Bag le phaisa bawm kai lak le lengah ka chuak. Khoika lei ka kal hmasa
lai zong ka thei lo. Ka theihmi cu, Samuel motor number lawng a si. Dawr thum
hrawng ka fuh nain ka hmu hna lo. Emaily nih a tu le tu phone a ka call ‘rak
lawi cang’ a ti.
‘hika hin rak ka dir piak ta’ tiah taxi driver cu ka chimh. Samuel motor
number a si ka fiang tuk. Ka tum i phone ka call colh. Motor mawngtu thutnak
thlanglang hmai ahcun phone a ring len ko nain tlau tu a ngei lo. Electric tung
kam ah ka dir, motor hnulei ah minung an um ti cu a fiang cang. Minute 40 chung
electric tung hram ah cun ka dir cang. Emily nih a tu le tu phone a hun ka
chawnh, ‘ka hmuh cang nak hna’ kong ka chim.
Minute 40 hnu ahcun motor hnulei khaan in Samuel a rak tum. A bawngbi a
van iremh pah khin, a hnulei ai her le a ka hmuh. Motor chung ah hodah um ti ka
thei lo buin motor innka cu own dingah ka zuan hnawh ve. Samuel nih a ka kham
chih. Tha le zang cu ka tei kho fam lo cu ta………rian rangin driver thutnak
innkhar ka own khawh le ahmai ah ka thu.
“hihi maw kan iduh lo na ti? Ka mit in kan hmuh komi hna zong hi hlen
nan ka timh rih maw?”
“tum, motor cung khan tum. Ziah mah bantuk in ka mualphonak ding in na
um”
“Samuel ka tum lai. Kan chimh bal ko khah! Ka mit in kan hmuh hna ni cu
kan (piat) then ni siseh kan ti kha, mah bia cu kan chim ta. Atu thok in ka
tlangval na si ti lo. Rak thei peng.”
Ka liang cung kai beimi bag cu vawlei ah ka rawt thluahmah. Lam khi ka
hmu kho huaha lo, a tlai cang fawn. Tlawmpal ka kal ah, ka hnulei in a rak ka
kuh.
“rak ka kup hlah, na darling ka si ti lo” a kut cu ka phen chih, a duh
lo.
“kan duh nak nih a ka tei tuk caah hin tuzaan ah hithil a can hi si.
Sorry!” a ka let hlei lo.
“ka thinlung nihkhin an theih tuk i dahkaw, na umnak zong hi ka rak phak
khawh cu”
“chim ti hlah, holh lo tein cikhat te hiti te hin in kup ta rih ning mu”
Ka thinlung ah zeihmanh a um tilo. Thlapa thla hnih chung lungre theih
in ka rak um mi vialte an tlau dih. A ka kuh len zongah ka feel kho ti lo.