LBC, Yangon |
“fimnak
dah tilo, zeidang vawlei ro chiah tak awk kan ngei hna lo”
Thaizing cu arkhuan hlan in thawh i kalay leiah
sianginn kai ding cu ka si cang tikah, kan mah chung te lawng zaan riah dum
ttinak le pumhnak bi te kan tuah. Kan mah chung ve lo bang ngakchia he zei he
kan sile puai fate tuahmi ko khi kan lo. Einak kheng bel fim thawng nih coka cu
a khuh dih cikcek. Hitin, ka hmailei i a rak kal cia mi ka u le pawl zong hi
thlacamnak te he ka nu le ka pa nih an rak thlah tawnmi hna an si. Atu zong
kalaymyo ah ka U le pahnih cu sianginn an kai cuahmah lio si. Phaisa kan ngeih
lo ruang theo ahcun thaizing zong hi keimah lawng kai thawh fawn lo, ka nu le
ka pa zong nih an ka thlah kho fawn lai lo. Nain, fimnak cu pei kan kawl lai,
kan cawn lai, kan hmuh lai cu ka ti cu.
“keimah hmanh sianginn ka rak kai duh lo ruang ah
lothlo pa ah kai chuah, ka thazang umek chuah in thlanti he rian ka tuan nain
zaan riah ei khim hmanh ka chuah pi kho lo. Fim cawnnak kan rak ngeih ve lo
ruangah hawihmai zongah kan chuak lang ngam ve lo. Ka fale nih ka sining, kan
chungkhar sining nan theih dihmi a si ko caah sianginn kai hi tei nan ma lai,
phaisa hman nan thiam lai, ca nan izuam ahcun a kai kho le a thiam nan siahcun
mi do cawi hmanh in sianginn nan kai lai”tiah ka pa nih a hmasa bik ah bia a
hun ka cah. Ka mitthli cu a mah luan khin a luang thluahmah ko. Ka thin le ka
lung a kuai dih, ka pa ka zangfak tuk. Fimnak ah a duhfah ningle a hakkau ning
hi ka ruat kho bak lo. Tlawmpal ah ka nu ka hung tho ve.
“kan inn pa le kan chakthlang pawl nih cun nan nu pa
in nan hrut cang hi teh a kan ti. Nan mah nu pa vial thideng mang in rian nan
tuan. Meh thaw ei le sa cuaikhat cawk hmanh nan i harh ko nain nan fale cu
khuapi ah sianginn nan kai ter hna, kawlram fim cawnnak cu degree an lak hnu
zongah zei an chuak pi hlei fawn lai lo. An kut ke nan hmuh hlan ah thlanmual
nan liam taak hna lai, a phu lo” ti hi kan tong veve. Ka nu a hnar ruhno nih a
tam, fahniang kal laiah mitthli tlak cu a duh lo tuk nain ai sum kho lo.
“fa le caah pei kan nun fam cu. Kan thisen dih tiang
kan cawm ko hna lai. Kan mah fa an si. Hote fa hmanh an si lo. Nu le pa san kan
tlaih lo ruangah hi dirhmun pei kan si cu. Kan fale fimnak ro kan pek khawh hna
cun kan thih sia zong rem cang ko lai” tiah ka leh tawn hna.
“rak kan zoh hmanh uh! Ka takcungah sui le ngun tinpaw
kauh tia zong nan hmu lai lo. Vawlei thilri ngeihmi zeihmanh kan ngei fawn lo.
Nihin nitiang mi dum le hau ah rian kan i hlawhfa peng nain cu vialte nakin a
sunglawi deuh fimnak ro dah lo zeihmanh chiah tak awk kan in ngei hna lo” cucu
fiang tein nan theih cun a za.
Bangkok, Calvary Church |
“ka fale hna nihhin MA degree hna, Dr. hna nan van si
tik ah khin cun lung nuam tein thlan khur ka lut ngam ko lai. Siaherh ding
zeihmanh kan ngei hna lai lo.” tiah rak chim lengmang mi bia a ruah pahcun
zangdam lo ngai in mawtaw cung ahcun a thu. Khua a dei rih lo, a bag fate cu ai
pom, mawtaw thlalang awng in an pal pahmi khua pakhat hnu pakhat in tap kam mei
ceu a hei hmuh hna ‘khua dei hlan in pei lo rian tuan ah an ithawh tawn ko
cu..mawtaw cit tham mah lawng zongah lileng ding um lo’ ti lei in ai hnem.
Ka dawtmi ka hawikom cheukhat hna kha ka kir tikah an
um ti hnga maw? pasal hna an rak ngei dih te sual hnga maw? Kum 1 chung ahhin
ka nu le ka pa an tar tuk manh hnga maw? an sam hna par te sual hnga maw? silo,
silo…..ca hi a tam tuk te lai maw? ca thiam kai harh tuk sual hnga maw? kawl
holh hna hi ka thiam zau te hnga maw? hawithar pa zeizat dah ka ngeih chap te
hnga??? Bia halnak lawng te nih a thuam.
“ka pa rak ka ngai tuk te hlah mu….” tiah ka kut cu
deilei thlizil sin ah a her.
“degree luchin he rak kir law kan don te lai fahniang”
thling nih chunhmi le khawn sualmi hma le rung in a mui chia ngaimi a kut bor
cu ka pa nih a hei chanh ve. A zapei hna zong an tet dih cang, a ban tha hna
zong an dih dih cang ka pa………
Note: The Chin Digest, 2017
Lovely Nancy
10/4/2017