Zeitik hmanh a tian ti lo ding bang
Tlangsang le horkuang vialte phentu
Khuadi, minmei, khuadawm le dapti
Cun, ka thinlung bang ai sarh dihmi chum.
Hi khuasik lak ah hi lunglen cu zeitin
ka tuar khawh hnga? Hi lio caan ah dawtmi hna he lawm le dam in lengti caan pei
si cu. Ka kiang na um ti lo hnu ah ho valpa dah ka orhlei kut tlai kho ti lai? Silo, maw December aw liam zau kun
law….lawmhnak ni thar hna hngak in Kum thar tu a kut tleih ka duh ko. Ka U,
tuzaan cu kan ngai tuk. Khoika hmun le
hma ka phak paoh ah ka thinlung chung ah na um ee.
Inn a tinlo nak ni 14 chung si cang.
Thaizing cun ni 15 tling cang lai, thlapa thlacheu bak hmulo, tonglo,phone
chawnlo le inn tin loin a um. Hi kong hi BBC nih theih sehlaw a puan cang men
lai. Ka U, nangmah tello cun zeitin mitkuh thaw in kai hngilh khawh hnga I
mangtha te cu ka manh khawh hnga? Ka U, zeitluk in kan duh le kan dawt, kan
herh le kan tleihchan na theih komi ah mah tin na ka tuah. Ni 14 chung bak rawl
loin ka um. Ka chumh zong ah keimah lawng ka ei kho bak lo, ka mithlam ah ka U
cuang peng. Hi lio caan ah hin khoika dah zaan riah a ei hnga? Mitkuh cim in a
it hnga maw? Ti’n keimah ca hmanh ruat lo in ka lungre thei.
Senri, tlangsangpar le tlang chokhleinak in iang
ngei deuhmi
Pupa rosung thluachuah ka tin comi
Pu Biak Hnin fanu kan co khawh ca’h kai lawm.
Wedding dress kha Bangkok ah kan cahmi a
phan I va lak ah nihin kal kai tim, cun lawi pah ah ring kan cahmi ka van hlam
pah lai i leng chuah lawlaw ah reception tik hruk ding zong designer Mokok Pauh
Pauk sin ah lak pah lawlaw kai I tim. Khi ni tik ah kai hruk dingmi dress, puar
zar, kan hman dingmi thil puan vial te hi blue in kan tuah ding. Blue hi peace hmelchunhnak
muici a si ruang ah ka thimmi a si i, ka uar tukmi muici zong a si fawn. Nain,
hi tluk in a ropui mi le a liannganmi a thiangthit umhnak puai hi ka chunmang
lawng ah ka manh khawh. Si ee, nu pakhat nih a duh bikmi pa he pathian le mipi
hmai ah kutsih lehthah tuah lawng silo in a duh bikmi dress, a dawtmi hawikom
le a chungkhar rualchan vialte he nuam le lawm in wedding tuah cu nu vialte I
kan chunmang si dih ko. Nain, hi vialte nak in a ropui deuhmi thit umhnak cu
inn khanbi te ah kan tuah minung pahnih, keimah le ka U he lawng hlunghlai ngaiin
kan tuah.
Inn khan chung ah thil cun tet khawt
ngai in thil kan fim. Pa hmei kan ti cu rawl chumh khinnak thilri zong
tlamtling in a ngei lo. Ihnak le cabuai pakhat, computer le thilsuk nak pung
pakhat lawng bak a ngei. Tan-lan ka umnak in ka hung I thial ve. Ka thilri hi a
tam ngai, nu kan ti cu sup sap le tuktak hi a rak tam kho tuk. Ka keden lawng
hmanh buri pahnih khat hrawng si. Ka cauk kha bizu fate pakhat tluk hrawng si
fawn. Nihin cu, thil kan fimnak le kan thirnak ah kan ba, inn pawng te ah a ummi
“ Khaing Khaing Kyaw “ ah zaan riah kan
ei. Kan inn pawng hi sii dawr, market restaurant le a dangdang a tling ngai.
Zeimaw, thil van herh duak zong ah cawk fawi zangte si. Hmunhma thar le inn
thar kan ti cu, fawi tein ka hngilh kholo, mahnak cun ka nu le ka pa nih
lungtlinh piak lomi pasal ka ngeih ca’h ka thintur, lung rethei phun hna khin
ka um. Hmailei kan nun lam le kan khuasak hi zei kan lawh te hnga ti ka tuak.
Ka lu ar lawm tia bak si. Keihi ca rel ka huam, ka U hi movie zoh a huam ve.
Kan I manh caan cun kan carel mi le movie kan zohmi hi kan I share tawn. Cauk
thar a chuah paoh hin cauk dawr ah ka tli tawn. Anih zong cenema thar le movie
thar chuah paoh cun caan rem kawl in kan zoh tawn. Kan life hi kai lungsi tuk,
duhdawtnak he cun hi inn khan fate hi kan ca’h vanram siko.
Ni tlawmpal a rauh ah khan ka pa he
phone kan I chawn “ka kong ah a lungre theih tuk nak kong, an mithmai bit tuk
nak kong le sang le zawl nih khu le phak in ka kong an rak ceihnak pawl kan I
ruah” thaw chuah har in ka ngeih ko. “kapa ka palh tuk ko nain zeitin tuah awk
tha tilo, hmailei ka nun lamtu Pathian nih lam kan hruai she! A ka dawttuk, a
ka zohkhenh tuk fawn, ka duhmi te ka co khawh ca’h nan cung ah kai lawm” ka ti
vial ah khin ka pa cu ngui ngui thlak in a tap. Ka pasal ca ding ah chunmang
lianpi a rak ngei, kum 25 ka si hnu lawng ah pasal ngeih ding a ka timh, Sweden
ummi pa pakhat he khuakhanmi zong an rak ngei cang. Ka pa nih mah bia vialte a
ka chimh pah cun ka mitthli tla ve. Fanu sual ka si, nu le pa mithmai bitter
tu, keimah le keimah ai thang chiatmi nu pakhat. Ka chungkhar nih ka ca’h a tha
bik khua an khan lio hmanh ah lam dang ka pial. Thlauchuah dong ding zong ah
kai tlak hrim lo. Nain, nai hrawng hi tluk in ka lungre thei le ka pa he kan I
chanwhmi vialte hi kaU ka chim lo. Ka chimh cun a lung nuam lai lo ti ka phang,
ka chungkhar kong he pehtlai in zei bia hmanh ka theihter bal lo.
Pum tlamtling in nu hrin fa ka si
Mah mit hmuh ah van ngaknu cio pei tiah
Mi fanu hi nan cohlan lo.
Nikhat cu zaan riah ei ding ka ser pah
khin “tukum Christmas cu thantlang kan hman ah tha lai” ka hei ti. A tuai
cuahmahmi computer cu hnu chit in a hun ka zoh “ ka nu nih tlun inn a kan onh
lai lo, yangon ah nuam tein hmang ko usih” a hun ka ti cu. Ka pum hi tek nih ka
tlak sehlaw ka dawhter ka thir dih. Taktak ti ah cun, ka duhmi pa kai thim
ruang ah ka chungkhar ka rualchan ka hlawt hna i thangchiat mualpho vialte kai
thim. “lam cung ah na ka charmi nu ka si lo, phaisa in na cawkmi anhringso tom
ka silo, mit le ka hmur le hnar ngeilo ka si lo, ka hrut rih fawn lo, kan I
umhnak kum khat hmanh tling cang lai. Zeiruang ah hi kong hi na theihter hna
lo” ka hun ti ve. Hi bia sualam ruah ah cun zu le va tluk lo minung pakhat
bantuk ka si. Nu a simi keimah hmanh nih mit chinh kam seh in ka chungkhar sin
ka chim. Zei tluk in ningzah ka tuar, kut dong sawh le thlanglamh ka ton ko bu
ah ka duhmi ka co khawh tiin kai hnem. Pa za simi nih hi tluk in ka cung ah a
hmur ah cip, a chim ngam lo cu a ka duh tak lo ruang siko tiin ka ruat ve cang.
Ka hmai ah a rak thu “ka nu cu chimh ka timh ko, ziah! Mah tluk in nai hnawh,
ni khat khat cu ka chimh te ko lai” a hun ka ti. Zei bantuk bia in dah ka leh
hnga nikhat khat a timi hi kum khat zong a rau kho, kum 5 zong a rau kho,
thlankhur kan luh tiang zong asi kho, “nikhat khat na timi hi zei tlukdah a
rauh lai an chim kho maw? Na ka duh tak lo, ka zawn na ruat lo, hna kar na ka
tenh lo, kan duhdawt na timi hi lih si” ka tah aw chuak. Rawl ka sermi ka kal
tak I ihnak khan ah ka lut. Ka U zong inn leng a chuak ve. Keizong mi fanu
pakhat, an dawt tukmi, an zoh thla tukmi, an ven tukmi ka si ve ko. Mah tluk
tiang in ka cung ah a tuah ser ding ah ka ruat lo, amah zong nu kei zong nu,
misingpi inn chungkhar monu si ciociomi a fapa ca’h zeidah ka phut lo nak.
Ka tahmi nih a rak ka thlim izaan tim ah
ka hun I tthang I ka U a rak um tilo, kan inn chung vialte ka kawl dih cikcek
ka hmu bak lo. A thil ka zoh a tling dih fawn. A phone ka call “ power off” ai
ti. Zaan tim ah cun ka thlan chuak dih, ka thaw sa bantuk in ka um. Ka U
pawngte ah it bantuk in ka rak ruat, nangmah tel lo cun hi inn chung ah hin
zeidah ka tuah hnga? Zei bia ka chimmi nih dah na lung an fah ter hnga?
Keimahnak upa a si tik ah zei bantuk paoh ah kai bochan, ka U chim ta loin zeithil
hmanh ka tuah lo. Phaisa hman ningcang
tiang in kan I thei dih. Ka U hi bia le hla zong in a lungfahnak ka tuah bal
lo, ngeihchia in um lai ti ka phan tuk ah keimah pumpak lungre theihnak hmanh
ka chim tawn lo. Ka hngilh khawhlo nak zaan 14 bak si cang. Rawl ka chun zong
ah ka eilo, zeihmanh eiduhnak ka ngei kho lo. KaU na zuun tuar a har tuk ee.
Vawlei kildeng ah kan ton
Taksa thlarau ah pumkhat kan si
Ka ca’h pasal tha na si
Kan duh tuk ka U.
Vawlei cu duhtling lo, kan nun caan
tawite chung ah lawm in kan lengti, na ka dawt, kan dawt ve. Vawlei thawtnam
kan tep ti, hihi ka chuahchan cu siko. Ka ca’h valdang an sem ti hnga maw?
Lengdang tangpom in sem pua cawi hmang law kan dawtnak hi a hmun ko lai.
Brithday lio laksawng vialte, anniversary kan tuahnak hmanthlak le laksawng
vialte ka U he ai pehtlai mi thilri vialte ka fim dih. Ka mithmuh ah silo in ka
thinlung ah a zungzal in chiah peng kan duh. Weekend paoh ah kan hlam rih lai,
sicun ka rawlchuanmi ta na hlam ve te lai maw? Khoika hmun ah a ho nu he khua
nan sak hmanh ah nai numah ding kan duh piak mu.., vawlei cu cikhat kan
khualtlawnnak lawng si ee. Inn a hlam lonak thlapa thal thum si cang, December
thla ka hung phan cang. Thilzil le khuadawm sin tel ah na aw nem ka thei kho
hnga maw? Voikhat te tel in na mui hmuh tak kan duh, silo ah khoika na um ti
tel thei ta ning law ka thihsia rem deuh hnga? Ka U. Hi khuasik lak ah hin ka
zapei a lumter khotu nangmah hung si than ko mu.
“Hello Miss Nancy” inn khar ka van on, mir hnawn khin nu pakhat nih biak chawnhnak a ka tuah. “Zeidah kan bawmh khawh lai, keimah hi Nancy cu ka si” ka hun ti vial ah, a kut in thil box a hun ka pek “EMS in si, singapor in thil kuat kan rak in pe” a van ti lio ah phone a ring.
"Hello"
"Chuahni sunglawi, kan dawt tuk" a ti. Kum caan liam in ka theih ti lomi 'aw' pakhat, ka caah cun hla dawh virh mi ko a lo. Hi vialte caan chung ahhin lungleng in ka um lio caan vialte zongah a rak ka dawt rih ko, na cungah kai lawm ka U.
note:
12/12/12
Lunglawmnak : Acunglei hman a ka thlak piaktu Kt Pau cungah kai lawm!