Ruakhua si, kai hrukmi angki khi (John Biak Tin Lian & Ram Hngak an thih philh lonak tuahmi si. |
Ahnu
Bik Zaan Riah Einak
Tutan
Kachin ram Laiza ah training a kai dingmi hi an dihlak in minung pa 7 an si.
Thaizing khi Hakha in Kachin ram laiza leiah ai thawh ding an si cang caah
zaanlei cu CNA leiin a kal ding a hawile he a nu le a pa nih an inn ah
thlacamnak tein zaan riah dum tinak an ngeih piak hna. Mah zaanlei hi a
chungkhar a rualchan le CNA a hawile pawl he a hnubik zaan riah an ei tti cu a
si ko. Keizong, mah ni cu zung zong ka kai kho ve lo. Alang hlat cun ka rak uai
len ve ko. Amah zong hi tutan Laiza kal ding cu a zenh tuk ve. Phone kan
ichawnh tawn ah hin bia a chim kho bak lo. “dam tein ka rak kir than lai, thla
ka cam piak” ti vial lawng hi a chim khawh.
John Biak Tin Lian thlan hmaiah (Hakha, 2017) |
November
5, Hakha khuasik zing 7:00am hrawng ah khin dawrhlun sang cho te cu an van
chuak, a sianginn kai tti hawile nih a kut cu pakhat hnu pakhat in a van tlaih.
A pi le a pu he ai tong than tilo ding bang in van ruah hang bang an mitthli
nih bia chim kholo in an hmur le an ka cu a hren dih cang. A farnu he cun fek
thup in an ikup “Nau, dam te’n mu” ti vial lawng khi a chim khawh. Anu nih a
bei piakmi a ruksai te cu mitthli he ai hei chanh vial ah khin, ngakchia chuaka
tah bantuk in a tap ve “kafa, tuzing cu kan ngai” a van ti vial cun motor gate
a ummi vialte cu cunglei, van khuadawm khi an zoh dih i, an mitthli cu cho lei
an hoih ter. Pakhat le pakhat ai zoh ngam an um lo. An nu farual, an pa farual
cun an ikup le an tap thuahmah ko. Motor nihcun kal dingin thawng a van thanh
hna. A hawile cheukhat cu sia rem tein a rak thu ciami zong an um cang. Sian
lonak a thongthong he motor cung a thutnak hmun cun a tantakmi a chungkhar cu a
kut nem a hei hlerh hna.
John Biak Tin Lian thlan kalnak lam kam #Chokhlei |
A
dawtmi chungkhar
A
dawtmi hawikom le innpa chakthlang
A
dawtmi Hakha le Chinram
A
dawtmi a tuanti hawi CNA
A
dawtmi Pathian sin ah ai din cang.
2014, November 19 ah
Kachin ram ah ram le miphun caah nunnak a pemi John Biak Tin Lian Le Ram Hngak
upat peknak caah ka tialmi lenhloi asi. Ka peh than te lai.