 |
| Faiceu Editor: Salai Robert |
KUALA LUMPUR: Ruah lo pi ngai in
Malaysia ram ah chikkhat a rak tlawng ta mi Chinmi nih Chin nu hna lakah
kan ngeihchun catial thiam Nancy Dawt Chin Sung cu nihin zaanlei ah
Faiceu he muihmai tonnak kan ngei kho.
Nancy Dawt Chin Sung @ Lovely Nancy hi
nungak dawhte zong a si i Faiceu nih cun hling lakah a eenmi Faiceu Par
bantuk in kan hmuh, harsatnak, khuasik tang le hling lak in a parmi a si
ko nain a een khunmi par khi a si.
Nancy hi Malaysia ah ni 7 chung lawng a
caam lai i hmaizarh Cawn Nihnihni zaanlei ah Kawlram lei ah a kir than
cang lai. Hi ka Malaysia a um chungah Khampat Christian Fellowship
(KCF) ah aa tum i thaizing hi Chin Christian Fellowship (CCF) ah a caan a
hman lai. A um chungah KCF siangngakchia pawl cachimnak le cawnpiaknak a
ngeihpiak hna.
Cun, nizaan ahkhan Chin Student
Organization (CSO) sianginn ah siangngakchia pawl a lengkai hna i nihin
ah Malaysia CNF Regional Committee he tonbiaruahnak a ngei.
Nancy
nih cun Malaysia ah ka rak rat cu a nuam tuk, cun hi ka ummi hna zong
hi nan rak i nuam tuk. Tlaihkhihnak le misual hna lakah khua nan sa hna
ko nain pawcawmnak le khuasaknak ah tlam a tlin deuh tikah Malaysia ah
nan um duhnak hi a si ko rua tiah Faiceu he tonnak kan ngeih lioah a
chim.
“Ka lung a tha lomi pakhat bal cu
fanau/ngakchia hna kong hi a si. Ningcang tein sianginn kai lo in le
fimnak cawng loin an um ka hmuh tikah hin ka celh bak lo. Hi ti i khua
an sak ding le an hmailei ca ahhin ka lung a tha hrim lo. Bia ka ruahmi
ngakchia hna then thum then khat nih cun Kawlram kir hi kan duh tiah an
ti”.
 |
| @ Malaysia |
“Cun, ngakchia hna nih an rak i ruahchan
bantuk in Malaysia ahhin thil hi a rak si lo. Nulepa hna zong nih an
fale caah kaupi in khua an ruahpiak hna lo in a lang. Cucaah, atu lio
ralzaam kongkau kan zoh tikah le ramthumnak kal ding hi a har ngai cang
caah nulepa hna nih ramthumnak an kal khawh lo ding a si ahcun an fale
ca ruah in biathlehnak ngei cang hna sehlaw a tha hnga”, tiah Nancy nih a
chim fawn.
Cun, Faiceu cung zongah, “Faiceu
riantuannak hi tha ka pek tuk. Cu bantuk in hmailei caan zongah pehzulh
peng khawh rak i zuam ko uh”, tiah forhfialnak bia a chim.
Nancy hi CNF chung riantuantu (staff) le
CNA chungtel pakhat zong a si i a hlan deuh ahkhan “Zuunngaih Par” timi
cauk a rak chuah cangmi a si i atu kum chungah a voihnihnak a chuahmi
cu Hringtu Nu le dawtnak kong a tialmi “Ka Nu” timi cauk a si. Hmailei
zongah catial le ca chuah hi aa tim zungzal mi a si.
Faiceu Journal chuah lio zong ah Yangon
lei in tuanvo a rak lami Faiceu Journal chungtel pakhat zong a rak si.
Hmai kum chung ahhin “A Phu Ko” timi tlangtar in ramkhel kong lenhloi
cauk zong a chuah than lai tiah theih a si. Atu ah a chuahmi “Ka Nu”
timi cauk zong thazaang pe cio hna u si. Uk khat ah RM 10 te lawng a si i
Faiceu sinah zong ah rak cawk khawh a si. (Pehtlaihnak – Robert
012-9764670).